പുതിയ ലുക്കിൽ പ്രേക്ഷകരെ ഞെട്ടിക്കാനൊരുങ്ങി ‘അങ്കമാലി ഡയറീസ്’ താരം

അങ്കമാലി ഡയറീസിലെ പെപ്പെ എന്ന കഥാപാത്രത്തിലൂടെ സിനിമാപ്രേമികളുടെ മനസ്സിൽ ഇടം നേടിയ താരമാണ് ആന്റണി വർഗീസ്. പുതിയ ലുക്കിൽ പ്രേക്ഷകരെ ഞെട്ടിക്കാനൊരുങ്ങുകയാണ് ആന്റണി ഇപ്പോൾ. ഫേസ്ബുക്കിലൂടെ താരം തന്നെയാണ് ചിത്രം പുറത്തുവിട്ടിരിക്കുന്നത്. പുതിയ ചിത്രത്തിന് വേണ്ടിയുള്ള മേക്ക് ഓവർ ആണോ ഇതെന്നറിയാനുള്ള ആകാംക്ഷയിലാണ് ആരാധകർ ഇപ്പോൾ.

അതേസമയം ‘സ്വാതന്ത്ര്യം അര്‍ധരാത്രിയില്‍’ എന്ന ചിത്രത്തിലാണ് ആന്റണി ഇപ്പോൾ അഭിനയിച്ചുകൊണ്ടിരിക്കുന്നത്. നവാഗതനായ ടിനു പാപ്പച്ചന്‍ സംവിധാനം ചെയ്യുന്ന ചിത്രം നിര്‍മ്മിക്കുന്നത് സംവിധായകന്‍ ബി ഉണ്ണിക്കൃഷ്ണനാണ്. ഫിനാന്‍സിംഗ് കമ്പനിയില്‍ ജോലി നോക്കുന്ന യുവാവിന്റെ വേഷമാണ് ആന്റണി ഈ ചിത്രത്തിൽ അവതരിപ്പിക്കുന്നത്.

ഒറ്റ രാത്രിയില്‍ നടക്കുന്ന സംഭവങ്ങളും തുടര്‍ന്നുള്ള പ്രശ്‌നങ്ങളുമാണ് സ്വാതന്ത്ര്യം അര്‍ധരാത്രിയില്‍’ എന്ന ചിത്രത്തിന്റെ ഇതിവൃത്തം. വിനായകന്‍, ചെമ്പന്‍ വിനോദ്, ടിറ്റോ വിത്സൺ എന്നിവരാണ് മറ്റ് പ്രധാനവേഷങ്ങൾ അവതരിപ്പിക്കുന്നത്. നവാഗതനായ ദിലീപ് കുര്യനാണ് തിരക്കഥ. അങ്കമാലി ഡയറീസിന്റെ സംവിധായകന്‍ ലിജോ ജോസ് പല്ലിശേരിയും തിരക്കഥാകൃത്ത് ചെമ്പന്‍ വിനോദും സഹനിര്‍മാതാക്കളായി ചിത്രത്തിലുണ്ട്.