ദുൽഖർ സൽമാന്റെ പ്രകടനം ജാക് സ്പാരോയെ അനുസ്മരിപ്പിച്ചുവെന്ന് സുഡാനി താരം സാമുവൽ…ഉടനെ എത്തി ദുൽഖറിന്റെ മറുപടി..

ആദ്യ ചിത്രം കൊണ്ട് തന്നെ മലയാളികളുടെ ഹൃദയത്തിൽ ഇടം പിടിച്ച താരമാണ് സാമുവൽ റോബിൻസൺ. സൗബിൻ ഷാഹിറിനെ നായകനാക്കി സക്കറിയ സംവിധാനം ചെയ്ത ചിത്രം സുഡാനി ഫ്രം നൈജീരിയയിലൂടെയായിരുന്നു സാമുവലിന്റെ കടന്ന് വരവ്. മികച്ച പ്രേക്ഷക അഭിപ്രായം നേടിയ ചിത്രം സാമുവലിന്റെയും സൗബിന്റെയും മികച്ച പ്രകടനത്താൽ ഏറെ ശ്രദ്ധിക്കപ്പെട്ടിരുന്നു. ചിത്രത്തിന്റെ വിജയത്തിന് ശേഷം പിന്നീട് സാമുവൽ തന്റെ നാടായ നൈജീരിയയിലേക്ക് തിരികെ പോവുകയും ചെയ്തിരുന്നു. എന്നാൽ സാമുവലും മലയാളികളുടെ പ്രിയതാരം ദുൽഖർ സൽമാനുമായുള്ള രസകരമായ ചാറ്റാണ് ഇപ്പോൾ നവമാധ്യമങ്ങളിൽ കൗതുകമായി മാറുന്നത്.

ചിത്രത്തിന്റെ റിലീസുമായി ബന്ധപ്പെട്ട അഭിമുഖത്തിലായിരുന്നു താൻ ദുൽഖറിന്റെ കടുത്ത ആരാധകനാണെന്ന് സാമുവൽ പണ്ട് വെളിപ്പെടുത്തിയത്. അന്ന് അത് വലിയ ചർച്ചയായി മാറുകയും ചെയ്തിരുന്നു. പക്ഷെ കഴിഞ്ഞ ദിവസം സാമുവൽ, ദുൽഖർ ചിത്രമായ ചാർളി കാണുന്ന വീഡിയോയുമായി ഇൻസ്റ്റാഗ്രാമിൽ എത്തി. ചിത്രം കാണാനായതിലുള്ള സന്തോഷവും സാമുവൽ ഇൻസ്റ്റാഗ്രാമിൽ പങ്കുവച്ചിരുന്നു. പക്ഷെ സാമുവലിനെ അത്ഭുദപ്പെടുത്തി മറുപടിയുമായി ദുൽഖർ എത്തുകയായിരുന്നു. ചിത്രം വളരെ രസകരമാണെന്ന് ദുല്ഖറിനോട് പറഞ്ഞ സാമുവൽ. ചിത്രത്തിലെ ദുൽഖർ സൽമാന്റെ പ്രകടനം പൈറേറ്റ്സ് ഓഫ് ദി കരീബിയൻ എന്ന ചിത്രത്തിലെ ജാക്‌സ്പാരോയെ അനുസ്മരിപ്പിക്കും വിധമായിരുന്നു എന്നും പറയുകയുണ്ടായി. ഉടനെ തന്നെ ദുൽഖറിന്റെയും മറുപടി എത്തി സുഡാനി ഫ്രം നൈജീരിയ താൻ കണ്ടിരുന്നെന്നും സാമുവലിന്റെയും സൗബിന്റെയും പ്രകടനം ഗംഭീരമായിരുന്നുവെന്നും ദുൽഖർ അഭിപ്രായപ്പെട്ടു. സാമുവൽ തന്നെയാണ് ചാറ്റ് ഇൻസ്റാഗ്രാമിലൂടെ ഷെയർ ചെയ്തത്.