സാജൻ ജോസഫ് ആലുക്ക വരുന്നു പുതിയ രൂപത്തിലും ഭാവത്തിലും..!

കുഞ്ചാക്കോ ബോബൻ നായകൻ ആയി എത്തുന്ന പുതിയ ചിത്രമാണ് അനിൽ രാധാകൃഷ്ണൻ മേനോൻ സംവിധാനം ചെയ്ത ദിവാൻജിമൂല ഗ്രാൻഡ് പ്രിക്‌സ്. ഈ വരുന്ന ജനുവരി അഞ്ചു മുതൽ ദിവാൻജിമൂല ഗ്രാൻഡ് പ്രിക്‌സ് കേരളത്തിലെ പ്രദർശന ശാലകളിൽ പ്രദർശനം ആരംഭിക്കാൻ പോവുകയാണ്. അനിൽ രാധാകൃഷ്ണൻ മേനോനും കളക്ടർ പ്രശാന്ത് നായരും ചേർന്ന് തിരക്കഥ എഴുതിയ ഈ ചിത്രം നിർമ്മിച്ചിരിക്കുന്നത് മാർസ് എന്റെർറ്റൈന്മെന്റിന്റെ ബാനറിൽ സംവിധായകൻ അനിൽ രാധാകൃഷ്ണൻ മേനോനും മസൂർ മുഹമ്മദും സഫീർ അഹമ്മദും ചേർന്നാണ്. സാജൻ ജോസഫ് എന്ന ഐ എ എസ് ഓഫീസർ ആയാണ് കുഞ്ചാക്കോ ബോബൻ ഈ ചിത്രത്തിൽ എത്തുന്നത്. ഇതേ പേരിൽ മറ്റൊരു ഐ എ എസ് ഓഫീസർ കഥാപാത്രത്തെ കുഞ്ചാക്കോ ബോബൻ വർഷങ്ങൾക്കു മുൻപ് അവതരിപ്പിച്ചിട്ടുണ്ട്.

അന്തരിച്ചു പോയ പ്രശസ്ത സംവിധായകനും തിരക്കഥാകൃത്തുമായ ലോഹിത ദാസ് ഒരുക്കിയ കസ്തൂരിമാൻ എന്ന ചിത്രത്തിൽ ആണ് കുഞ്ചാക്കോ ബോബൻ ഇതിനു മുൻപ് സാജൻ ജോസഫ് എന്ന പേരിൽ ഐ എ എസ് ഓഫീസർ കഥാപാത്രം ആയി എത്തിയത്. സാജൻ ജോസഫ് ആലുക്ക എന്നായിരുന്നു ആ ചിത്രത്തിലെ കുഞ്ചാക്കോ ബോബൻ കഥാപാത്രത്തിന്റെ പേര്. ദിവാൻജിമൂല ഗ്രാൻഡ് പ്രിക്‌സ് ആ കഥയുടെയോ കഥാപാത്രത്തിന്റെയോ തുടർച്ച അല്ലെങ്കിലും കഥാപാത്രങ്ങളുടെ പേരിലുള്ള ഈ സാമ്യം ശ്രദ്ധ നേടുന്നു. സാജൻ ജോസഫ് ആലുക്ക പുതിയ രൂപത്തിലും ഭാവത്തിലും എത്തുകയാണ് എന്ന രീതിയിൽ ആണ് ആരാധകരും സിനിമാ പ്രേമികളും ഈ കഥാപാത്രത്തെ കുറിച്ച് ഇപ്പോൾ ചർച്ച ചെയ്യുന്നത്. ഇനി ഈ രണ്ടു കഥാപാത്രങ്ങളും തമ്മിൽ എന്തെങ്കിലും ബന്ധം ഉണ്ടോ എന്ന് ചിത്രം കാണുമ്പോൾ മാത്രമേ നമ്മുക്ക് മനസ്സിലാവൂ.

നൈല ഉഷ ആണ് ഈ ചിത്രത്തിലെ നായികാ വേഷം അവതരിപ്പിക്കുന്നത്. നൈലക്കു പുറമെ സിദ്ദിഖ്, വിനായകൻ, സുധീർ കരമന, ജോയ് മാത്യു, സുധി കോപ്പ, രാജീവ് പിള്ളൈ, നിർമ്മൽ, ഷഹീൻ സിദ്ദിഖ് എന്നിവരും ഈ ചിത്രത്തിൽ അഭിനയിക്കുന്നുണ്ട്. തൃശൂരിന്റെ പശ്ചാത്തലത്തിൽ ആണ് ഈ ചിത്രം ഒരുങ്ങിയിരിക്കുന്നതാണ്. അലക്സ് ജെ പുളിക്കൽ ദൃശ്യങ്ങൾ നൽകിയിരിക്കുന്ന ഈ ചിത്രത്തിന് ഗോപി സുന്ദർ സംഗീതം പകർന്നിരിക്കുന്നു .