ആരാധകർക്ക് നിരാശ; രാജമൗലിയുടെ ബ്രഹ്മാണ്ഡ ചിത്രം റിലീസ് ഇല്ല; ഇനിയെന്ന്..?

സൂപ്പർ ഹിറ്റ് സംവിധായകൻ എസ് എസ് രാജമൗലി ഒരുക്കിയ ബ്രഹ്മാണ്ഡ ചിത്രമാണ് ആർ ആർ ആർ. ഇന്ത്യൻ സിനിമയിലെ ഏറ്റവും വലിയ ചിത്രമായി ഒരുക്കിയ ആർ ആർ ആർ ഈ വരുന്ന ജനുവരി ഏഴിന് ലോകം മുഴുവൻ റിലീസ് ചെയ്യാൻ ആയിരുന്നു തീരുമാനിച്ചിരുന്നത്. അതിനോട് അനുബന്ധിച്ചു ചിത്രത്തിന്റെ പ്രമോഷൻ ജോലികളും നടക്കുകയായിരുന്നു. എന്നാൽ കോവിഡ് വൈറസിന്റെ വകഭേദമായ ഓമിക്രോൺ വ്യാപനം രൂക്ഷമായതോടെ ഇന്ത്യയുടെ പല ഭാഗത്തും വിദേശത്തുമടക്കം തീയേറ്ററുകൾ അടച്ചിടാനും ഒട്ടേറെ നിയന്ത്രണങ്ങൾ വരുത്താനും തുടങ്ങിയതോടെ ഈ ചിത്രത്തിന്റെ റിലീസും പ്രതിസന്ധിയിലായി. ഇപ്പോഴിതാ, ഈ ചിത്രത്തിന്റെ റിലീസ് മാറ്റി വെച്ചിരിക്കുകയാണ് എന്ന വിവരം ഒഫീഷ്യൽ ആയി തന്നെ പുറത്തു വിട്ടിരിക്കുകയാണ് അണിയറ പ്രവർത്തകർ. ഇപ്പോഴത്തെ സാഹചര്യം നമ്മുടെ നിയന്ത്രണത്തിൽ അല്ലെന്നും അതുകൊണ്ട് റിലീസ് മാറ്റുകയാണ് എന്നും മറ്റൊരു സമയത്തു ഈ ചിത്രം പ്രേക്ഷകരുടെ മുന്നിൽ എത്തിക്കുമെന്ന് അവർ ഉറപ്പു പറയുന്നുണ്ട്.

റാം ചരൺ, ജൂനിയർ എൻ ടി ആർ, ബോളിവുഡ് താരം അജയ് ദേവ്‌ഗൺ, ആലിയ ഭട്ട് എന്നിവർ ആണ് ഈ ചിത്രത്തിലെ പ്രധാന വേഷങ്ങൾ ചെയ്യുന്നത്. ബാഹുബലി സീരിസ് രചിച്ച കെ വി വിജയേന്ദ്ര പ്രസാദ് എഴുതിക്കിയ കഥയ്ക്ക്, സംവിധായകൻ എസ് എസ് രാജമൗലി തന്നെ തിരക്കഥ രചിച്ചിരിക്കുന്ന ഈ ചിത്രം നിർമ്മിച്ചിരിക്കുന്നത് ഡി വി വി എന്റെർറ്റൈന്മെന്റ്സ് ആണ്. ഒളിവിയ മോറിസ്, സമുദ്രക്കനി, റേ സ്റ്റീവൻസൺ, അലിസൻ ഡൂഡി, ശ്രിയ സരൺ, ഛത്രപതി ശേഖർ, രാജീവ് കനകാല എന്നിവരും അഭിനയിച്ചിരിക്കുന്ന ഈ ചിത്രത്തിന് സംഗീതം ഒരുക്കിയത് കീരവാണിയും ക്യാമറ ചലിപ്പിച്ചത് സെന്തിൽ കുമാറും എഡിറ്റ് ചെയ്തത് ശ്രീകർ പ്രസാദുമാണ്.

ഫോട്ടോ കടപ്പാട്: ട്വിറ്റെർ