രാജമൗലിയുടെ ബ്രഹ്മാണ്ഡ ചിത്രം; ആർ ആർ ആർ റിലീസ് തീയതി പ്രഖ്യാപിച്ചു..!

തെലുങ്കിലേ സൂപ്പർ ഹിറ്റ് സംവിധായകൻ എസ് എസ് രാജമൗലി ഒരുക്കിയ ബ്രഹ്മാണ്ഡ ചിത്രം ആർ ആർ ആർ റിലീസ് ആവുന്നതും കാത്തിരിക്കുകയാണ് ഇപ്പോൾ ലോകമെമ്പാടുമുള്ള ഇന്ത്യൻ സിനിമാ ആരാധകർ. ഈ കഴിഞ്ഞ ജനുവരി ഏഴിന് ആണ് ഈ ചിത്രം റിലീസ് ചെയ്യാനിരുന്നത് എങ്കിലും, കോവിഡ് മൂന്നാം തരംഗം രാജ്യത്തു ആഞ്ഞടിച്ചതോടെ റിലീസ് മാറ്റി വെക്കുകയായിരുന്നു. ഇപ്പോഴിതാ ഈ ചിത്രത്തിന്റെ ഏറ്റവും പുതിയ റിലീസ് ഡേറ്റ് ഒഫീഷ്യൽ ആയി പ്രഖ്യാപിച്ചിരിക്കുകയാണ് അണിയറ പ്രവർത്തകർ. ഈ വർഷം മാർച്ച് 25 നു ആണ് ആർ ആർ ആർ ആഗോള റിലീസ് ആയി എത്തും എന്ന് ഇപ്പോൾ പ്രഖ്യാപിച്ചിരിക്കുന്നത്. തെലുങ്കു, തമിഴ്, മലയാളം, ഹിന്ദി, കന്നഡ തുടങ്ങി അഞ്ചു ഭാഷകളിൽ ആണ് ഈ ചിത്രം റിലീസ് ചെയ്യാൻ പോകുന്നത്. ഇന്ത്യൻ സിനിമ കാണാൻ പോകുന്ന ഏറ്റവും വലിയ റിലീസ് ആവും ഈ ചിത്രം നേടുക എന്നാണ് സൂചന.

തീയേറ്ററുകൾ ഫുൾ കപ്പാസിറ്റിയിൽ ഓപ്പൺ ആകുമ്പോൾ ആണ് ഈ ചിത്രം പുറത്തു വരൂ എന്നാണ് ആർ ആർ ആർ ടീം നേരത്തെ സൂചിപ്പിച്ചിരുന്നത്. റാം ചരൺ, ജൂനിയർ എൻ ടി ആർ, ബോളിവുഡ് താരം അജയ് ദേവ്‌ഗൺ, ആലിയ ഭട്ട് എന്നിവർ പ്രധാന വേഷങ്ങൾ ചെയ്ത ഈ ചിത്രത്തിൽ ഒളിവിയ മോറിസ്, സമുദ്രക്കനി, റേ സ്റ്റീവൻസൺ, അലിസൻ ഡൂഡി, ശ്രിയ സരൺ, ഛത്രപതി ശേഖർ, രാജീവ് കനകാല എന്നിവരും അഭിനയിച്ചിട്ടുണ്ട്. ഡി വി വി എന്റെർറ്റൈന്മെന്റ്സ് നിർമ്മിച്ചിരിക്കുന്ന ഈ ചിത്രത്തിന് സംഗീതം ഒരുക്കിയത് കീരവാണിയും ക്യാമറ ചലിപ്പിച്ചത് സെന്തിൽ കുമാറും എഡിറ്റ് ചെയ്തത് ശ്രീകർ പ്രസാദുമാണ്. രാജമൗലി തന്നെ തിരക്കഥ രചിച്ച ഈ ചിത്രത്തിന്റെ കഥ രചിച്ചത് ബാഹുബലി സീരിസ് രചിച്ച കെ വി വിജയേന്ദ്ര പ്രസാദ് ആണ്.

ഫോട്ടോ കടപ്പാട്: ട്വിറ്റർ