പ്രിയദർശനൊരുക്കുന്ന ത്രില്ലറിൽ മലയാളത്തിലെ വമ്പൻ യുവതാരനിര; കൂടുതൽ വിവരങ്ങളിതാ

മലയാള സിനിമയുടെ മാസ്റ്റർ ഡയറക്ടർ പ്രിയദർശൻ വരുന്ന മാസങ്ങളിൽ രണ്ടു ചിത്രങ്ങളാണ് ചെയ്യാൻ പോകുന്നതെന്നാണ് സൂചന. അതിലൊന്ന് എം ടി വാസുദേവൻ നായരുടെ തിരക്കഥയിൽ മോഹൻലാൽ നായകനാവുന്ന ഓളവും തീരവും എന്ന ചിത്രമാണെങ്കിൽ മറ്റൊന്ന് മലയാളത്തിലെ യുവതാരനിരയണിനിരക്കുന്ന ഒരു ത്രില്ലറാണ്. ഈ ചിത്രത്തിലൂടെ പ്രിയദർശൻ നിർമ്മാതാവ് കൂടിയാവുകയാണെന്നാണ് ക്യാൻ ചാനൽ മീഡിയ റിപ്പോർട്ട് ചെയ്യുന്നത്. ഫോർ ഫ്രെയിംസ് എന്ന തന്റെ ബാനറിൽ അദ്ദേഹം നിർമ്മിക്കുന്ന ഈ ചിത്രത്തിന് തിരക്കഥയൊരുക്കുന്നതും പ്രിയദർശൻ തന്നെയാണ്. റോഷന്‍ മാത്യു, ഷൈന്‍ ടോം ചാക്കോ, അര്‍ജുന്‍ അശോകന്‍ എന്നിവരാണ് ഈ ചിത്രത്തിലെ കേന്ദ്ര കഥാപാത്രങ്ങളെയവതരിപ്പിക്കുക. അതുപോലെ തന്നെ സിദ്ദിക്കും ഈ ചിത്രത്തിന്റെ താരനിരയിലുണ്ടാകും. ഓഗസ്റ്റ് ഒന്നിന് എറണാകുളത്തു ഷൂട്ടിംഗ് ആരംഭിക്കാൻ പോകുന്ന ഈ ചിത്രത്തിന്റെ മറ്റൊരു ലൊക്കേഷൻ തൊടുപുഴയാണ്.

ചിത്രത്തിന്റെ ടൈറ്റിൽ പ്രഖ്യാപനം ഉടൻ തന്നെയുണ്ടാവുമെന്നാണ് വാർത്തകൾ പറയുന്നത്. ദിവാകർ ക്യാമറ ചലിപ്പിക്കുന്ന ഈ ചിത്രത്തിന്റെ സഹനിർമ്മാതാവായി എത്തുന്നത് ബാദുഷയാണ്. ഷാനവാസ് ഷാജഹാനും സജിയുമാണ് ഈ ത്രില്ലർ ചിത്രത്തിന്റെ ലൈന്‍ പ്രൊഡ്യൂസേഴ്‌സ്. ഇതിനു മുൻപ് പ്രിയദർശൻ ഒരുക്കിയ ത്രില്ലർ ചിത്രമാണ് ഒപ്പം. മോഹൻലാൽ നായകനായെത്തിയ ഈ ചിത്രം മലയാള സിനിമയിലെ ഏറ്റവും വലിയ വിജയങ്ങളിലൊന്നായി മാറി, 50 കോടി ക്ലബ്ബിലിടം പിടിച്ച ചിത്രമാണ്. ഇപ്പോൾ യുവതാരനിരക്കൊപ്പം പ്രിയദർശൻ ഒന്നിക്കുന്നുവെന്നത് തന്നെ സിനിമ പ്രേമികൾക്കു ഏറെ ആവേശം പകരുന്ന വാർത്തയാണ്. മോഹൻലാൽ നായകനായ ഒരു ബിഗ് ബഡ്ജറ്റ് സ്പോർട്സ് ഡ്രാമ ചിത്രവും പ്ലാൻ ചെയ്യുന്ന പ്രിയദർശൻ, ഹിന്ദിയിൽ അക്ഷയ് കുമാർ നായകനായ ഒരു ചിത്രം കൂടിയൊരുക്കാനുള്ള തയ്യാറെടുപ്പിലാണ്. ഉർവശി നായികാ വേഷം ചെയ്ത ഒരു തമിഴ് ചിത്രമാണ് ഇനി റിലീസ് ചെയ്യാനുള്ള പ്രിയദർശൻ പ്രൊജക്റ്റ്.