പൊന്നി നദിയുടെ കാണാകാഴ്ചകൾ പ്രേക്ഷകരുടെ മുന്നിലേക്ക്; പൊന്നിയിൻ സെൽവൻ രണ്ടാം ഭാഗം റിലീസ് തീയതിയെത്തി

മാസ്റ്റർ ഡയറക്ടർ മണി രത്‌നത്തിന്റെ ബ്രഹ്മാണ്ഡ ചിത്രമായ പൊന്നിയിൻ സെൽവൻ ഒന്നാം ഭാഗം ഈ കഴിഞ്ഞ സെപ്റ്റംബർ മാസത്തിലാണ് റിലീസ് ചെയ്തത്. തമിഴിലെ ഇൻഡസ്ട്രി ഹിറ്റായി മാറിയ ഈ ചിത്രം, തമിഴ് നാട്ടിൽ നിന്ന് മാത്രം ഇരുനൂറ് കോടി കളക്ഷൻ നേടുന്ന ആദ്യ ചിത്രവുമായി മാറി. ആഗോള ഗ്രോസ് ആയി അഞ്ഞൂറ് കോടിക്ക് മുകളിൽ കളക്ഷൻ നേടിയ ചിത്രം കൂടിയാണ് പൊന്നിയിൻ സെൽവൻ. കൽക്കി കൃഷ്ണമൂർത്തി എഴുതിയ, പൊന്നിയിൻ സെൽവനെന്ന അഞ്ചു ഭാഗങ്ങൾ ഉള്ള ബ്രഹ്മാണ്ഡ നോവലിനെ അടിസ്ഥാനമാക്കി രണ്ട് ഭാഗങ്ങളായാണ് ഈ ചിത്രം ഒരുക്കിയത്. 1000 വർഷങ്ങൾക്ക് മുൻപ് തമിഴ്‌നാടിന് വേണ്ടി ചോളന്മാർ നൽകിയ സംഭാവനകളും മണ്ണിന് വേണ്ടി അവർ നടത്തിയ പോരാട്ടങ്ങളുമാണ് ഈ ചിത്രത്തിലൂടെ സംവിധായകൻ നമ്മുടെ മുന്നിലെത്തിക്കുന്നത്. വിക്രം, കാർത്തി, ഐശ്വര്യ റായ്, ജയം രവി, തൃഷ, ഐശ്വര്യ ലക്ഷ്മി, ജയറാം, ലാൽ, ബാബു ആന്റണി, റിയാസ് ഖാന്‍, റഹ്മാന്‍, ശരത് കുമാർ, പാർത്ഥിപൻ, പ്രഭു, കിഷോർ, വിക്രം പ്രഭു, ശോഭിത, നിഴൽകൾ രവി, അർജുൻ ചിദംബരം, റഹ്മാൻ, മോഹൻ റാം എന്നിവർ അഭിനയിച്ച ഈ ചിത്രം നിർമ്മിച്ചിരിക്കുന്നത് ലൈക്ക പ്രൊഡക്ഷൻസ്, മണി രത്‌നത്തിന്റെ മദ്രാസ് ടാകീസ് എന്നിവർ ചേർന്നാണ്.

ഇപ്പോഴിതാ, പ്രേക്ഷകർ ഏറെ ആകാംഷയോടെ കാത്തിരിക്കുന്ന ഇതിന്റെ രണ്ടാം ഭാഗത്തിന്റെ റിലീസ് തീയതിയും എത്തിയിരിക്കുകയാണ്. 2023 ഏപ്രില്‍ 28 ന് പൊന്നിയിൻ സെൽവൻ രണ്ടാം ഭാഗം റിലീസ് ചെയ്യുമെന്ന്, പ്രശസ്ത തെന്നിന്ത്യൻ ട്രേഡ് അനലിസ്റ്റ് രമേശ് ബാല ട്വീറ്റ് ചെയ്തു. ഒന്നാം ഭാഗത്തിനൊപ്പം തന്നെ രണ്ടാം ഭാഗത്തിന്റെയും ചിത്രീകരണം മണി രത്‌നം പൂർത്തിയാക്കിയിരുന്നു. രണ്ടാം ഭാഗത്തിന്റെ വി എഫ് എക്സ് ജോലികളാണ് ഇപ്പോൾ നടന്ന് കൊണ്ടിരിക്കുന്നത്. സംവിധായകൻ മണി രത്‌നവും ഇളങ്കോ കുമാരവേലും ചേർന്ന് രചിച്ച ഈ ചിത്രത്തിനു സംഗീതമൊരുക്കിയത് എ ആർ റഹ്മാൻ, ക്യാമറ ചലിപ്പിച്ചത് രവി വർമ്മൻ, എഡിറ്റ് ചെയ്തിരിക്കുന്നത് ശ്രീകർ പ്രസാദ് എന്നിവരാണ്.