മോഹൻലാൽ-വിജയ് ദേവരക്കൊണ്ട ടീം ഒന്നിക്കുന്നു?; വമ്പൻ പാൻ ഇന്ത്യൻ ചിത്രം ഒരുങ്ങുന്നു

മലയാളത്തിന്റെ മഹാനടൻ മോഹൻലാൽ നായകനായി പ്രഖ്യാപിച്ച പാൻ ഇന്ത്യൻ ബിഗ് ബഡ്ജറ്റ് ചിത്രമാണ് ഋഷഭ. മലയാളം- തെലുങ്ക് ഭാഷകളിൽ ഒരുക്കുന്ന ഈ ചിത്രം തമിഴ്, കന്നഡ, ഹിന്ദി ഭാഷകളിലും റിലീസ് ചെയ്യുമെന്ന് പ്രഖ്യാപിച്ചിരുന്നു. മോഹൻലാലിനൊപ്പം ഒരു തെലുങ്ക് യുവതാരവും ഈ ചിത്രത്തിലെ പ്രധാന വേഷത്തിൽ പ്രത്യക്ഷപ്പെടുമെന്നും അന്നവർ വെളിപ്പെടുത്തിയിരുന്നു. ആ യുവതാരം, തെലുങ്കിലെ യുവ സൂപ്പർ താരങ്ങളിലൊരാളായ വിജയ് ദേവരക്കൊണ്ടയാണെന്ന റിപ്പോർട്ടുകളാണ് ഇപ്പോൾ പുറത്ത് വരുന്നത്. ഒടിടി പ്ലേയ് മീഡിയയാണ് ഈ വിവരം ഇപ്പോൾ പുറത്ത് വിട്ടിരിക്കുന്നത്. മോഹൻലാൽ കഥാപാത്രത്തിന്റെ മകൻ ആയാണ് വിജയ് ദേവരക്കൊണ്ട ഈ ചിത്രത്തിൽ അഭിനയിക്കുക എന്നാണ് സൂചന. ആക്ഷൻ, വൈകാരിക മുഹൂർത്തങ്ങൾ എന്നിവക്ക് പ്രാധാന്യം നൽകുന്ന, അച്ഛൻ- മകൻ ബന്ധത്തിന്റെ കഥ പറയുന്ന ഒരു ചിത്രമായിരിക്കും ഋഷഭ. കന്നഡ സംവിധായകനായ നന്ദകുമാറാണ് ഈ ചിത്രം സംവിധാനം ചെയ്യാൻ പോകുന്നത്.

ഈ ചിത്രം നിർമ്മിക്കുന്നത് എ വി എസ് സ്റ്റുഡിയോയുടെ ബാനറിൽ അഭിഷേക് വ്യാസ്, പ്രവീർ സിങ്, ശ്യാം സുന്ദർ എന്നിവർ ചേർന്നാണ്. അച്ഛൻ- മകൻ ബന്ധത്തിന്റെ കഥ തലമുറകളിലൂടെ പറയുന്ന ഒരു എപിക് ഇമോഷണൽ ഡ്രാമയാണ് ഈ ചിത്രമെന്നും, ആക്ഷനും പ്രാധാന്യമുള്ള ഈ ചിത്രം ഒരു വമ്പൻ ദൃശ്യ വിസ്മയമായി ഒരുക്കാനാണ് പ്ലാൻ ചെയ്യുന്നതെന്നും മോഹൻലാൽ ഈ ചിത്രം പ്രഖ്യാപിച്ചു കൊണ്ട് വെളിപ്പെടുത്തിയിരുന്നു. തണുപ്പുള്ള ലൊക്കേഷനുകളിലാണ് ഈ ചിത്രം ഷൂട്ട് ചെയ്യാൻ പോകുന്നതെന്നും അവർ വെളിപ്പെടുത്തി. അടുത്ത വർഷം അവസാനത്തോടെ ആരംഭിക്കാൻ പ്ലാൻ ചെയ്യുന്ന ഈ ചിത്രം 2024 ലാണ് റിലീസ് ചെയ്യുക.