ദളപതി വിജയ്‌യുടെ വാരിസ് വിതരണം ചെയ്യുന്നതിൽ നിന്ന് പിന്മാറി റെഡ് ജയന്റ് മൂവീസ്

ദളപതി വിജയ് നായകനായി എത്തുന്ന ഏറ്റവും പുതിയ ചിത്രമാണ് വാരിസ്. സൂപ്പർ ഹിറ്റ് തെലുങ്ക് സംവിധായകൻ വംശി പെഡിപള്ളി സംവിധാനം ചെയ്യുന്ന ഈ ചിത്രം അടുത്ത വർഷം ജനുവരിയിൽ പൊങ്കൽ റിലീസായി ആണ് പ്രേക്ഷകരുടെ മുന്നിലെത്തുക. ഇതിന്റെ പോസ്റ്ററുകൾ, ഇതിലെ വിജയ് ആലപിച്ച ഒരു ഗാനം എന്നിവ ഇപ്പോഴേ സൂപ്പർ ഹിറ്റാണ്. ഈ ചിത്രത്തിന്റെ ഓഡിയോ ലോഞ്ച് ഡിസംബർ അവസാന വാരം നടക്കുമെന്നും വാർത്തകൾ വരുന്നുണ്ട്. ഇപ്പോഴിതാ വാരിസിന്റെ തമിഴ്നാട് വിതരണത്തെ സംബന്ധിച്ച ഒരു വാർത്തയാണ് ശ്രദ്ധ നേടുന്നത്. വാരിസ് തമിഴ് നാട്ടിൽ തങ്ങൾ വിതരണം ചെയ്യുന്നില്ല എന്ന ഉദയനിധി സ്റ്റാലിന്റെ പ്രസ്താവനയാണ് ഇപ്പോൾ പുറത്ത് വന്നിരിക്കുന്നത്. സെവൻ സ്ക്രീൻ സ്റ്റുഡിയോസ് വിതരണം ചെയ്യാൻ പോകുന്ന വാരിസിന്റെ തീയേറ്റർ ചാർട്ടിങ് നടത്തുന്നത് ഉദയനിധി സ്റ്റാലിന്റെ റെഡ് ജയന്റ് മൂവീസാണ് എന്ന വാർത്തകൾ നേരത്തെ വന്നിരുന്നു.

എന്നാൽ വാരിസിന്റെ വിതരണവുമായി തങ്ങൾക്ക് യാതൊരു ബന്ധവുമില്ല എന്നാണ് റെഡ് ജയന്റ് മൂവീസ് വ്യക്തമാക്കുന്നത്. വിജയ്ക്കും വാരിസ് എന്ന ചിത്രത്തിനും എല്ലാവിധ ആശംസകളും നേരുന്നു എന്നും ഉദയനിധി സ്റ്റാലിൻ പറഞ്ഞു. പൊങ്കൽ റിലീസായി എത്തുന്ന തല അജിത് ചിത്രം തുനിവ് ആണ് റെഡ് ജയന്റ് മൂവീസ് വിതരണം ചെയ്യാൻ പോകുന്നത്. എച്ച് വിനോദ് സംവിധാനം ചെയ്ത ഈ ഹെയ്‌സ്റ്റ് ത്രില്ലറിൽ മഞ്ജു വാര്യരാണ് നായികാ വേഷം ചെയ്യുന്നത്. തമിഴ്‌നാട്ടിലെ ഏറ്റവും വലിയ, ഏറ്റവും കൂടുതൽ സ്വാധീനമുള്ള നിർമ്മാണ- വിതരണ ബാനറാണ് ഉദയനിധി സ്റ്റാലിന്റെ നേതൃത്വത്തിലുള്ള റെഡ് ജയന്റ് മൂവീസ്. രശ്‌മിക മന്ദാന നായികാ വേഷം ചെയ്യുന്ന വിജയ് ചിത്രം വാരിസ് നിർമ്മിച്ചിരിക്കുന്നത് തെലുങ്ക് നിർമ്മാതാവായ ദിൽ രാജുവാണ്.