ആസിഫ് അലി- ജിസ് ജോയ് ചിത്രത്തിന് റെക്കോർഡ് ഓവർസീസ് റൈറ്റ്സ്; വിജയ് സൂപ്പറും പൗർണ്ണമിയും പ്രദർശനത്തിന് ഒരുങ്ങുന്നു..!

ജിസ് ജോയ്- ആസിഫ് അലി കൂട്ടുകെട്ടിൽ നിന്ന് പുറത്തു വരാൻ പോകുന്ന മൂന്നാമത്തെ ചിത്രമാണ് വിജയ് സൂപ്പറും പൗർണ്ണമിയും. ഇതിനു മുൻപ് ബൈസൈക്കിൾ തീവ്സ്, സൺ‌ഡേ ഹോളീഡേ എന്നീ രണ്ടു സൂപ്പർ ഹിറ്റ് ചിത്രങ്ങൾ നമ്മുക്ക് സമ്മാനിച്ച ഈ കൂട്ടുകെട്ടിന്റെ മൂന്നാമത്തെ ചിത്രത്തെ കുറിച്ചും പ്രേക്ഷകർക്ക് പ്രതീക്ഷകൾ ഏറെയാണ്. ഒരു വമ്പൻ വിജയം മുന്നിൽ കണ്ടു തന്നെയാണ് ഈ കൂട്ടുകെട്ട് വീണ്ടും എത്തുന്നത്. ഇപ്പോൾ ലഭിക്കുന്ന റിപ്പോർട്ടുകൾ പ്രകാരം റിലീസിന് മുൻപേ ഈ ചിത്രം ചരിത്രം സൃഷ്ടിച്ചു തുടങ്ങി. ആസിഫ് അലിയുടെ കരിയറിൽ ഒരു പുതിയ റെക്കോർഡ് നേട്ടം ഈ ചിത്രം ഇപ്പോഴേ ഉണ്ടാക്കി കഴിഞ്ഞു. അരക്കോടിയിലേറെ രൂപയ്ക്കു ഈ ചിത്രത്തിന്റെ ഓവർസീസ് റൈറ്റ്സ് വിറ്റു പോയി കഴിഞ്ഞതായി നിർമ്മാതാവ് എ കെ സുനിൽ അറിയിച്ചു. ന്യൂ സൂര്യ ഫിലിമ്സിന്റെ ബാനറിൽ ആണ് സുനിൽ ഈ ചിത്രം നിർമ്മിച്ചിരിക്കുന്നത്.

ആസിഫ് അലിയുടെ കരിയറിൽ ആദ്യമായി ആണ് റിലീസിന് മുൻപേ തന്നെ ഇത്ര വലിയ തുകക്ക് ഒരു ചിത്രത്തിന്റെ ഓവർസീസ് റൈറ്റ്സ് വിറ്റു പോകുന്നത്. വേൾഡ് വൈഡ് ഫിലിംസും പ്ളേ ഫിലിംസ് ഓസ്‌ട്രേലിയയുമാണ് ഈ ചിത്രത്തിന്റെ ഓവർസീസ് വിതരണാവകാശം നേടിയെടുത്തിരിക്കുന്നതു. ഐശ്വര്യ ലക്ഷ്മി നായികാ വേഷത്തിൽ എത്തുന്ന ഈ ചിത്രത്തിൽ ആസിഫ് അലിയോടൊപ്പം ബാലു വർഗീസ്, ജോസഫ് അന്നംക്കുട്ടി , രഞ്ജി പണിക്കർ, സിദ്ദിഖ് , അജു വർഗീസ്, അലെൻസിയർ, ശാന്തി കൃഷ്ണ തുടങ്ങി ഒരു വലിയ താര നിര തന്നെ അണിനിരക്കുന്നുണ്ട്. പ്രിൻസ് ജോർജ് സംഗീതം സംവിധാനം നിർവഹിച്ചിരിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയത് റെനഡിവേ ആണ്.