നടനും നിർമ്മാതാവുമായ വിജയ് ബാബുവിനെതിരെ ബലാത്സംഗക്കേസ്..!

മലയാളത്തിലെ പ്രശസ്ത നടനും നിർമ്മാതാവുമാണ് വിജയ് ബാബു. ഫ്രൈഡേ ഫിലിം ഹൌസ് എന്ന പോപ്പുലർ സിനിമാ നിർമ്മാണ കമ്പനിയുടെ ഉടമസ്ഥൻ ആണ് അദ്ദേഹം. തന്റെ നിർമ്മാണ കമ്പനിയുടെ ഒട്ടേറെ പുതിയ സംവിധായകർ, രചയിതാക്കൾ, നടീനടന്മാർ എന്നിവരെ മലയാള സിനിമയിലേക്ക് കൊണ്ട് വന്നിട്ടുള്ള വിജയ് ബാബു, നായകനായും വില്ലനായും ഹാസ്യ താരമായുമെല്ലാം അഭിനയിച്ചു കയ്യടി നേടിയിട്ടുള്ള നടൻ കൂടിയാണ്. ഇപ്പോഴിതാ അദ്ദേഹത്തിനെതിരെ ഒരു ബലാത്സംഘ കേസ് വന്നിരിക്കുകയാണ്. കോഴിക്കോട് സ്വദേശി നല്‍കിയ പരാതിയിലാണ് ഇപ്പോൾ അദ്ദേഹത്തിനെതിരെ പോലീസ് കേസെടുത്തിരിക്കുന്നത്. സിനിമയില്‍ കൂടുതല്‍ അവസരങ്ങള്‍ വാഗ്ദാനം ചെയ്ത് എറണാകുളത്തെ ഫ്‌ലാറ്റില്‍ വെച്ച് നിരവധി തവണ ബലാത്സംഗം ചെയ്‌തെന്നാണ് വിജയ് ബാബുവിന് എതിരെ വന്നിരിക്കുന്ന പരാതി.

എറണാകുളം സൗത്ത് പൊലീസാണ് വിജയ് ബാബുവിന് എതിരെയുള്ള പരാതിയിൽ കേസ് എടുത്തിരിക്കുന്നത്. ഈ മാസം 22നാണ് യുവതി വിജയ് ബാബുവിനെതിരെ പരാതിയുമായി പൊലീസിനെ സമീപിച്ചത് എന്നും റിപ്പോർട്ടുകൾ പറയുന്നു. ബലാത്സംഗം, ഗുരുതരമായി പരിക്കേല്‍പ്പിക്കല്‍ തുടങ്ങിയ വകുപ്പുകള്‍ ചുമത്തിയാണ് പോലീസ് വിജയ് ബാബുവിന് എതിരെ കേസെടുത്തിരിക്കുന്നത് എന്നാണ് അറിയാൻ സാധിക്കുന്നത്. എന്നാൽ ഇതുവരെ വിജയ് ബാബുവിനെ അറസ്റ്റ് ചെയ്യാനോ ചോദ്യം ചെയ്യാനോ വിജയ് ബാബുവിന് സാധിച്ചിട്ടില്ല. പ്രതി ഒളിവിൽ ആണെന്നാണ് പോലീസ് പറയുന്നത്. ഇതിനിടക്ക്‌ ഈ വാർത്തകളോട് പ്രതികരിച്ചു കൊണ്ട് വിജയ് ബാബു കഴിഞ്ഞ ദിവസം ഫേസ്ബുക്കിൽ ലൈവിൽ വരുകയും, തനിക്കു എതിരെ കേസ് നൽകിയ യുവതിയുടെ പേര് വെളിപ്പെടുത്തുകയും ചെയ്തു. ഇപ്പോൾ അതിന്റെ പേരിൽ കൂടി അദ്ദേഹത്തിന് എതിരെ കേസ് എടുക്കുമെന്നാണ് പോലീസ് അറിയിച്ചിരിക്കുന്നത്.