നമ്മുടെ സൊസൈറ്റിയിൽ ഞാൻ പറയണം എന്നാഗ്രഹിക്കുന്ന വിഷയങ്ങൾ ആണ് ഈ സിനിമയിലൂടെ പുറത്തു കൊണ്ട് വരുന്നത് എന്ന് രജിഷാ വിജയൻ

മലയാളത്തിലെ മുൻനിര നായികമാരിൽ ഒരാളായ രജിഷാ വിജയന്റെ ഏറ്റവും പുതിയ ചിത്രമാണ് വിധു വിൻസെന്റ് സംവിധാനം ചെയ്ത സ്റ്റാൻഡ് അപ്. അധികം വൈകാതെ റിലീസ് ചെയ്യാൻ പോകുന്ന ഈ ചിത്രത്തിൽ നിമിഷ സജയനും രജിഷയും ആണ് കേന്ദ്ര കഥാപാത്രങ്ങളെ അവതരിപ്പിക്കുന്നത്. പ്രശസ്ത സംവിധായകൻ ബി ഉണ്ണികൃഷ്ണൻ, നിർമ്മാതാവ് ആന്റോ ജോസഫ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന് തിരക്കഥ ഒരുക്കിയിരിക്കുന്നത് ഉമേഷ് ഓമനക്കുട്ടൻ ആണ്. ഇപ്പോഴിതാ ഈ ചിത്രത്തെ കുറിച്ച് ഓൺലുക്കേഴ്സ് മീഡിയയോട് മനസ്സ് തുറക്കുകയാണ് രജിഷാ വിജയൻ.

വ്യത്യസ്തമായ ഒരു പ്രമേയം ആണ് ചർച്ച ചെയ്യുന്നത് എന്നതാണ് തന്നെ ഈ ചിത്രത്തിലേക്ക് ആകർഷിച്ച ആദ്യ ഘടകം എന്ന് പറയുന്നു രജിഷാ വിജയൻ. സ്റ്റാൻഡ് അപ് കോമഡി ആണ് ഇതിന്റെ കഥാ പശ്ചാത്തലം ആയി വരുന്നത്. തന്റെ കഥാപാത്രവും താൻ ഇതുവരെ ചെയ്തതിൽ നിന്നൊക്കെ വ്യത്യസ്തമായിരുന്നു എന്നതിനൊപ്പം തന്നെ താൻ ഈ സമൂഹത്തിൽ പറയണം എന്ന് ആഗ്രഹിച്ച ഒട്ടേറെ കാര്യങ്ങൾ വെളിപ്പെടുത്തുന്ന ചിത്രം കൂടിയാണ് സ്റ്റാൻഡ് അപ് എന്നും ഈ നടി പറഞ്ഞു. സോഷ്യൽ മീഡിയയിൽ വെറും ഹാഷ് ടാഗ് മാത്രം ആയി പോകാതെ വീണ്ടും വീണ്ടും ചർച്ച ചെയ്യപ്പെടണം എന്ന് താൻ വ്യക്തിപരമായി ആഗ്രഹിച്ച ചില കാര്യങ്ങൾ ഈ ചിത്രത്തിലൂടെ സമൂഹത്തിനു മുന്നിലേക്ക് എത്തിക്കുന്നുണ്ട് എന്നാണ് രജിഷാ വിജയൻ വെളിപ്പെടുത്തുന്നത്. വളരെ സീരിയസ് ആയി തന്നെയാണ് അത്തരം വിഷയങ്ങൾ ഈ ചിത്രത്തിലൂടെ ഡീൽ ചെയ്തിരിക്കുന്നത് എന്നും ഈ നടി ഓൺലുക്കേഴ്സിനോട് പറഞ്ഞു.