കൈ കാണിക്കുന്നതോ വയറ് കാണിക്കുന്നതോ അല്ല പ്രശ്‌നം; ഐറ്റം ഡാന്‍സിനോടുള്ള വിയോജിപ്പിനുള്ള കാരണം തുറന്ന് പറഞ്ഞു രജിഷ വിജയൻ..!

മലയാള സിനിമയിലെ മികച്ച നടിമാരുടെ കൂട്ടത്തിലാണ് രജിഷ വിജയന് സ്ഥാനം. അനുരാഗ കരിക്കിൻ വെള്ളമെന്ന സൂപ്പർ ഹിറ്റ് ചിത്രത്തിലൂടെ മലയാളത്തിലരങ്ങേറ്റം കുറിച്ച രജിഷക്ക് ആ ചിത്രത്തിലെ മികച്ച പ്രകടനത്തിലൂടെ തന്നെ മികച്ച നടിക്കുള്ള സംസ്ഥാന ചലച്ചിത്ര പുരസ്‍കാരം സ്വന്തമാക്കാനായി. അതിന് ശേഷം നായികാ പ്രാധാന്യമുള്ള ഒട്ടേറെ ചിത്രങ്ങളിലഭിനയിച് കയ്യടി നേടിയ ഈ നടി കർണ്ണൻ, ജയ് ഭീം എന്നീ ഗംഭീര തമിഴ് ചിത്രങ്ങളിലെ നായികാ വേഷം ചെയ്‌തും വലിയ കയ്യടിയാണ് നേടിയത്. മലയാളത്തിൽ ഫൈനൽസ്, ജൂൺ, സ്റ്റാൻഡ് അപ്, ഹോ ഖോ, ലവ് എന്നീ ചിത്രങ്ങളിൽ ഗംഭീര പ്രകടനമാണ് രജിഷ നൽകിയത്. ഇപ്പോഴിതാ, ഈ നടി നായികാ വേഷം ചെയ്യുന്ന കീടമെന്ന ചിത്രവും റിലീസിനൊരുങ്ങുകയാണ്. എന്നാൽ ഇപ്പോൾ റേഡിയോ മിര്‍ച്ചിയ്ക്ക് നല്‍കിയ അഭിമുഖത്തിൽ, സിനിമയിലെ ഐറ്റം ഡാൻസിനെ കുറിച്ച് രജിഷ പറഞ്ഞ വാക്കുകളാണ് ശ്രദ്ധ നേടുന്നത്.

ഐറ്റം ഡാന്‍സ് കളിക്കാന്‍ തനിക്ക് ഇഷ്ടമല്ലെന്നും, എന്നാൽ അതിനർത്ഥം ഗ്ലാമറസായുള്ള റോളുകൾ ചെയ്യില്ലെന്നോ, അല്ലെങ്കില്‍ ആ രീതിയിലുള്ള വസ്ത്രങ്ങള്‍ ഇടിലെന്നോ അല്ലെന്നും രജിഷ കൂട്ടിച്ചേർക്കുന്നു. അത് പോലുള്ള വേഷങ്ങള്‍ താൻ അശ്ലീലമായി കാണാത്തിടത്തോളം തനിക്കു അതില്‍ പ്രശ്നമില്ലെന്നാണ് ഈ നടി പറയുന്നത്. ശരീരത്തിന് അനുയോജ്യമാണെങ്കില്‍ അത്തരം വസ്ത്രങ്ങള്‍ ധരിക്കുമെന്നും, കൈ കാണിക്കില്ല, വയറ് കാണിക്കില്ല എന്നത് പോലുള്ള പ്രശനങ്ങളൊന്നും തനിക്കില്ലെന്നും അവർ വിശദീകരിക്കുന്നു. എന്നാൽ, അതിനെ ഒബ്ജക്ടിഫൈ ചെയ്യുന്നതാണ് തനിക്കു യോജിക്കാൻ കഴിയാത്തതെന്നു രജിഷ പറഞ്ഞു. ഐറ്റം ഡാൻസിൽ അതിലെ പാട്ടും, പാട്ടിലെ വരികളും, ക്യാമറ ആംഗിളും, സൂം ചെയ്യുന്ന രീതിയും, അതിലെ ഡാന്‍സ് മൂവ്മെന്റ്സുമൊക്കെ മനുഷ്യ ശരീരത്തെ ഒബ്ജക്ടിഫൈ ചെയ്യുകയാണെന്നും, അതുകൊണ്ടാണ് അതിനോട് വിയോജിപ്പുള്ളതെന്നും ഈ നടി വ്യക്തമാക്കുന്നു.