സൂര്യക്ക് നന്ദി പറയുന്നു; എന്ത്‌കൊണ്ടാണ് നന്ദി പറഞ്ഞതെന്നു വിക്രം കണ്ടു കഴിയുമ്പോൾ നിങ്ങൾക്ക് മനസ്സിലാകും; ലോകേഷ് കനകരാജ്..!

ഇന്നലെയാണ് ലോകേഷ് കനകരാജ് ഒരുക്കിയ ഏറ്റവും പുതിയ ചിത്രമായ വിക്രത്തിന്റെ ഓഡിയോ ലോഞ്ചും ട്രൈലെർ ലോഞ്ചും നടന്നത്. മാനഗരം, കൈതി, മാസ്റ്റർ എന്നീ വലിയ ഹിറ്റുകൾക്കു ശേഷം ലോകേഷ് ഒരുക്കിയ ചിത്രമാണിത്. ഉലകനായകൻ കമൽ ഹാസൻ നായകനായെത്തിയ ഈ ചിത്രത്തിന്റെ ട്രൈലെർ ഇപ്പോൾ സോഷ്യൽ മീഡിയയിൽ തരംഗമായി മാറിക്കഴിഞ്ഞു. താരസമ്പന്നമായ ഓഡിയോ ലോഞ്ചിൽ സംസാരിക്കവെ ഈ ചിത്രത്തിൽ ഒരതിഥി വേഷം ചെയ്യുന്ന സൂര്യക്ക് നന്ദി പറഞ്ഞു കൊണ്ടാണ് ലോകേഷ് സംസാരിച്ചത്. താൻ എന്തുകൊണ്ടാണ് സൂര്യക്ക് നന്ദി പറയുന്നതെന്നും, വിക്രം കണ്ടു കഴിയുമ്പോൾ നിങ്ങൾക്ക് മനസ്സിലാകുമെന്നാണ് ലോകേഷ് ആരാധകരോടും സിനിമാ പ്രേമികളോടും പറയുന്നത്. ഈ ചിത്രത്തിൽ സൂര്യ ഉണ്ടെന്നത് രഹസ്യമാക്കി വെക്കാനാണ് ആഗ്രഹിച്ചതെന്നും, എന്നാൽ ആ വിവരം ലീക്കായ സ്ഥിതിക്ക് ഇനി ഒളിച്ചു വെച്ചിട്ടു കാര്യമില്ലെന്നും അദ്ദേഹം പറഞ്ഞിരുന്നു.

ഇവർക്കൊപ്പം ഒരു വലിയ താരനിരയാണ് ഈ ചിത്രത്തിൽ അണിനിരക്കുന്നത്. കമൽഹാസന് പുറമെ മലയാള യുവ താരം ഫഹദ് ഫാസിൽ, മക്കൾ സെൽവൻ വിജയ് സേതുപതി, ചെമ്പൻ വിനോദ്, കാളിദാസ് ജയറാം, നരെയ്ൻ, അർജുൻ ദാസ് എന്നിവരാണ് ഈ ചിത്രത്തിൽ പ്രത്യക്ഷപ്പെടുന്ന മറ്റു താരങ്ങൾ. ജൂൺ മൂന്നിനാണ് ഈ ചിത്രം ആഗോള റിലീസായെത്തുന്നത്. കമൽ ഹാസൻ തന്നെ തന്റെ നിർമ്മാണ ബാനർ ആയ രാജ് കമൽ ഇന്റർനാഷനലിന്റെ കീഴിൽ നിർമിക്കുന്ന ഈ ചിത്രത്തിന് സംഗീതം ഒരുക്കിയത് അനിരുദ്ധ് രവിചന്ദർ, ക്യാമറ ചലിപ്പിച്ചത് മലയാളിയായ ഗിരീഷ് ഗംഗാധരൻ, എഡിറ്റ് ചെയ്യുന്നത് ഫിലോമിൻ രാജ് എന്നിവരാണ്. ത്നകുമാറും ലോകേഷ് കനകരാജും ചേര്‍ന്നാണ് ഈ ആക്ഷൻ ചിത്രത്തിന്റെ തിരക്കഥയൊരുക്കിയത്.