മോഹൻലാൽ- ലിജോ ജോസ് പെല്ലിശ്ശേരി ചിത്രത്തിലൂടെ രാധിക ആപ്‌തെ വീണ്ടും മലയാളത്തിൽ

കംപ്ലീറ്റ് ആക്ടർ മോഹൻലാലിനെ നായകനാക്കി ലിജോ ജോസ് പെല്ലിശ്ശേരി ഒരുക്കാൻ പോകുന്ന ആദ്യ ചിത്രം കഴിഞ്ഞ മാസമാണ് പ്രഖ്യാപിച്ചത്. വമ്പൻ ബഡ്ജറ്റില് ഒരുക്കാൻ പോകുന്ന ഈ ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും വൈകാതെ റിലീസ് ചെയ്യുമെന്ന പ്രതീക്ഷയിലാണ് ആരാധകർ. ഷിബു ബേബി ജോണിന്റെ ജോൺ മേരി ക്രീയേറ്റീവ്, സെഞ്ച്വറി ഫിലിംസ്, മാക്സ്‌ലാബ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന്റെ താരനിരയെ കുറിച്ചും ഒട്ടേറെ വാർത്തകൾ പുറത്തു വരുന്നുണ്ട്. ജോജു ജോർജ്, ആന്റണി വർഗീസ്, ചെമ്പൻ വിനോദ്, വിനായകൻ എന്നിവർ ഈ ചിത്രത്തിന്റെ ഭാഗമാകുമെന്ന് സ്ഥിതീകരിക്കാത്ത റിപ്പോർട്ടുകൾ വന്നിരുന്നു. ഇപ്പോഴിതാ ഈ ചിത്രത്തിലെ നായികാ വേഷം ചെയ്യുന്നത് പ്രശസ്ത ബോളിവുഡ് നായികാ താരം രാധിക ആപ്‌തെ ആണെന്ന റിപ്പോർട്ടുകളാണ് പുറത്ത് വരുന്നത്. നേരത്തെ ഫഹദ് ഫാസിലിന്റെ നായികയായി ഹരം എന്ന മലയാള ചിത്രത്തിൽ രാധിക അഭിനയിച്ചിട്ടുണ്ട്.

ഈ വാർത്ത സത്യമാണെങ്കിൽ ഇന്ത്യൻ സിനിമയിലെ ഏറ്റവും പ്രതിഭാധനയായ നായികമാരിലൊരാളെ, ഇന്ത്യൻ സിനിമയിലെ തന്നെ ഏറ്റവും മികച്ച നടന്മാരിലൊരാളായ മോഹൻലാലിനൊപ്പം ഓൺസ്‌ക്രീനിൽ കാണാനുള്ള ഭാഗ്യമാണ് പ്രേക്ഷകർക്ക് ലഭിക്കുക. ജനുവരി പതിനൊന്നിന് ഷൂട്ടിംഗ് ആരംഭിക്കുന്ന ഈ ചിത്രത്തിൽ മോഹൻലാൽ ഒരു ഗുസ്തിക്കാരൻ ആയാണ് അഭിനയിക്കുന്നതെന്നാണ് വാർത്തകൾ പറയുന്നത്. ഹൈദരാബാദ്, രാജസ്ഥാൻ തുടങ്ങിയ സംസ്ഥാനങ്ങളിലാണ് ഈ ചിത്രം ഷൂട്ട് ചെയ്യുക എന്നും വാർത്തകൾ വരുന്നുണ്ട്. ഈ ചിത്രത്തിലെ അണിയറ പ്രവർത്തകരെ കുറിച്ചുള്ള വിവരങ്ങളും വൈകാതെ പുറത്ത് വരുമെന്നാണ് സൂചന. മധു നീലകണ്ഠനാവും ഈ ചിത്രത്തിന് ക്യാമറ ചലിപ്പിക്കുക എന്നും, പ്രശാന്ത് പിള്ളയാണ് ഇതിന് സംഗീതമൊരുക്കുകയെന്നും വാർത്തകളുണ്ട്.