ആഗോള റിലീസ് ആയി പ്രഭാസിന്റെ ബ്രഹ്മാണ്ഡ റൊമാന്റിക് ചിത്രം; രാധേ ശ്യാം ഇന്ന് മുതൽ..!

പാൻ ഇന്ത്യൻ സൂപ്പർ താരമായ പ്രഭാസ് നായകനായി എത്തുന്ന ഏറ്റവും പുതിയ ചിത്രമായ രാധേ ശ്യാം ഇന്ന് മുതൽ പ്രദർശനം ആരംഭിക്കുകയാണ്. കേരളത്തിലെ ഇരുനൂറോളം സ്‌ക്രീനുകളിൽ ഈ ചിത്രം റിലീസ് ചെയുന്നത് ബി ഉണ്ണികൃഷ്ണന്റെ ആർ ഡി ഇല്ല്യൂമിനേഷൻ എന്ന ബാനർ ആണ്. ഒരു റൊമാന്റിക് ത്രില്ലർ ആയി ഒരുക്കിയിരിക്കുന്ന ഈ ചിത്രം ഇന്ത്യൻ സിനിമയിലെ തന്നെ ഏറ്റവും വലിയ റിലീസുകളിൽ ഒന്നായി ആണ് എത്തുന്നത്. വിദേശ മാര്ക്കറ്റിലെ ഏറ്റവും വലിയ ഇന്ത്യൻ റിലീസ് ആയാണ് രാധേ ശ്യാം എത്തുന്നത് എന്നതാണ് മറ്റൊരു പ്രത്യേകത. റിലീസിന് മുൻപ് തന്നെ നാനൂറു കോടിയുടെ പ്രീ റിലീസ് ബിസിനസ് ആണ് ഈ ചിത്രം നടത്തിയത് എന്ന റിപ്പോർട്ടുകളും പുറത്തു വന്നിരുന്നു. ഈ ചിത്രത്തിന്റെ ടീസർ, ട്രൈലെർ, പ്രീ റിലീസ് വീഡിയോ എന്നിവ സൂപ്പർ ഹിറ്റായിരുന്നു. പൂജ ഹെഗ്‌ഡെ നായികാ വേഷം ചെയ്യുന്ന ഈ ചിത്രം വമ്പൻ ബഡ്ജറ്റിൽ ആണ് ഒരുക്കിയിരിക്കുന്നത്.

വിക്രമാദിത്യ എന്ന കഥാപാത്രമായി പ്രഭാസും പ്രേരണ എന്ന കഥാപാത്രമായി പൂജ ഹെഗ്ഡെയും എത്തുന്ന ഈ ചിത്രം യുവി ക്രിയേഷന്‍, ടി – സീരീസ് എന്നീ ബാനറില്‍ ഭൂഷണ്‍ കുമാര്‍, വാംസി, പ്രമോദ് എന്നിവര്‍ ചേർന്നാണ് നിർമ്മിച്ചിരിക്കുന്നത്. രാധാകൃഷ്ണ കുമാർ സംവിധാനം ചെയ്തിരിക്കുന്ന ഈ ചിത്രം തെലുങ്ക്, ഹിന്ദി, തമിഴ്, മലയാളം, കന്നഡ എന്നീ അഞ്ച് ഭാഷകളില്‍ ആയി ആണ് റിലീസ് ചെയ്യുക. ഇതിന്റെ മലയാളം വേർഷനിൽ ശബ്ദ വിവരണം നൽകിയിരിക്കുന്നത് മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ ആണ്. സച്ചിന്‍ ഖേദേക്കര്‍, ഭാഗ്യശ്രീ, പ്രിയദര്‍ശി, മുരളി ശര്‍മ, സാശാ ചേത്രി, കുനാല്‍ റോയ് കപൂര്‍ എന്നിവരും അഭിനയിക്കുന്ന ഈ ചിത്രം, ജനനം മുതല്‍ മരണം വരെ തന്റെ ജീവിതത്തില്‍ നടക്കുന്ന കാര്യങ്ങള്‍ അറിയാവുന്ന, വിക്രമാദിത്യൻ എന്ന ഹസ്തരേഖ വിദഗ്ദ്ധന്റെ ജീവിതത്തിലെ പ്രണയ കഥയാണ് പറയുന്നത് എന്നാണ് സൂചന.