അറബിക് കുത്ത് ഡാൻസുമായി രശ്‌മിക മന്ദാനയും വരുൺ ധവാനും; വീഡിയോ കാണാം..!

ദളപതി വിജയ് നായകനായി എത്തുന്ന ഏറ്റവും പുതിയ ചിത്രമായ ബീസ്റ്റിലെ ആദ്യ ഗാനം ഇപ്പോൾ ലോകം മുഴുവൻ ട്രെൻഡിങ് ആയാണ് നിൽക്കുന്നത്. റിലീസ് ചെയ്ത നിമിഷം മുതൽ ബ്ലോക്ക്ബസ്റ്റർ ആയി മാറിയ ഈ ഗാനം ഇപ്പോഴും സോഷ്യൽ മീഡിയയിൽ ഏവരുടെയും ഫേവറിറ്റ് ആണ്. അറബിക് കുത്ത് എന്ന് പേരിട്ടു, അറബിക് സ്റ്റൈൽ മ്യൂസിക്, വരികൾ എന്നിവക്കൊപ്പം തമിഴ് ബീറ്റുകൾ മിക്സ് ചെയ്താണ്, സംഗീത സംവിധായകൻ അനിരുദ്ധ് രവിചന്ദർ ഈ ഗാനം ഒരുക്കിയിരിക്കുന്നത്. അനിരുദ്ധ് രവിചന്ദർ, ജോണിത ഗാന്ധി എന്നിവർ ചേർന്ന് പാടിയ ഈ ഗാനത്തിന്റെ ലിറിക് വീഡിയോ ആണ് റിലീസ് ചെയ്തത് എങ്കിലും, അതിനൊപ്പം തന്നെ ദളപതിയുടെ കിടിലൻ നൃത്ത ചുവടുകളും ഉൾപ്പെടുത്തിയിട്ടുണ്ട്. വിജയ്‌ക്കൊപ്പം ഇതിലെ നായികാ വേഷം ചെയ്യുന്ന പൂജ ഹെഗ്ഡെയും ഈ ഗാനത്തിന് ചുവടു വെക്കുന്നുണ്ട്.

ഇപ്പോൾ നമ്മുക്ക് സോഷ്യൽ മീഡിയയിൽ കാണാൻ സാധിക്കുന്നത് സെലിബ്രിറ്റികൾ ഉൾപ്പെടെ ഈ ഗാനത്തിന് നൃത്തം ചെയ്യുന്ന വീഡിയോ പങ്കു വെക്കുന്നത് ആണ്. അതിൽ ഏറ്റവും പുതിയത് സൂപ്പർ തെന്നിന്ത്യൻ നായികയായ രശ്‌മിക മന്ദാനയുടേത് ആണ്. രശ്‌മികക്ക് ഒപ്പം ബോളിവുഡ് യുവ താരം വരുൺ ധവാനും ഈ ഗാനത്തിന് ചുവടു വെക്കുന്നുണ്ട്. ഏതായാലും ഇരുവരും ചേർന്നുള്ള അറബിക് കുത്ത് ഡാൻസ് വീഡിയോ ആരാധകർ ഏറ്റെടുത്തു കഴിഞ്ഞു. വിജയ് നായകനായി എത്തുന്ന അടുത്ത തമിഴ് / തെലുങ്കു ദ്വിഭാഷാ ചിത്രത്തിൽ നായികാ വേഷം ചെയ്യുന്നത് രശ്‌മിക ആണെന്നാണ് സൂചന. വംശി ഒരുക്കുന്ന ഈ ചിത്രം ദിൽ രാജു ആണ് നിർമ്മിക്കുന്നത്. അതേ സമയം, നെൽസൺ ദിലീപ്കുമാർ ഒരുക്കിയ ബീസ്റ്റ് ഏപ്രിൽ മാസത്തിൽ ആഗോള റിലീസ് ആയെത്തും.