ക്യാമ്പസ് ചിത്രങ്ങളുടെ പട്ടികയിൽ ‘ക്വീൻ’ ട്രെയിലർ ഒന്നാം സ്ഥാനത്ത്

ക്യാമ്പസ് ചിത്രങ്ങളുടെ ട്രെയിലറുകളിൽ ഒന്നാം സ്ഥാനം നേടി ‘ക്വീൻ’ ടീസർ. അങ്കമാലി ഡയറീസ്, മെക്‌സിക്കൻ അപാരത എന്നീ ചിത്രങ്ങളെ പിന്തള്ളി, റിലീസായി മണിക്കൂറുകൾക്കുള്ളിലാണ് ‘ക്വീൻ’ ഈ നേട്ടം സ്വന്തമാക്കിയിരിക്കുന്നത്. ചിത്രത്തിന്റെ മോഷൻ പോസ്റ്ററും മേക്കിങ് വീഡിയോയും മുൻപ് തന്നെ ശ്രദ്ധിക്കപ്പെട്ടിരുന്നു. മേക്കിങ് വീഡിയോയിൽ പരിചയപ്പെടുത്തിയ ‘ആരാണ്ടാ ആരാണ്ടാ ഞാന്‍ റോയല്‍ മെക്കാണ്ടാ’ എന്നുതുടങ്ങുന്ന മെക്ക് ആന്തവും യുവാക്കൾക്കിടയിൽ തരംഗമായിരുന്നു. എന്നാൽ ഇതിലൊന്നും ചിത്രത്തിലെ നായികയെ സംബന്ധിക്കുന്ന വിവരങ്ങൾ പുറത്തുവിട്ടിട്ടില്ല.

ക്യാമ്പസ് രാഷ്ട്രീയവും ഡിപ്പാര്‍ട്ട്‌മെന്റുകള്‍ തമ്മിലുള്ള മത്സരവും എല്ലാമടങ്ങിയ സമ്പൂര്‍ണ ക്യാമ്പസ് പാക്കേജ് തന്നെയാവും സിനിമയായിരിക്കും ഇതെന്നാണ് ട്രെയിലറിൽ നിന്നെല്ലാം വ്യക്തമാകുന്നത്. ചിത്രത്തിന്റെ തിരക്കഥ നിർവഹിച്ചിരിക്കുന്നത് മെക്കാനിക്കല്‍ എഞ്ചിനീയർമാരായ ജെബിന്‍, ജോസഫ് ആന്റണി, ഷാരിസ് മുഹമ്മദ് എന്നിവര്‍ ചേര്‍ന്നാണ്. 16 സിനിമയുടെ അസോസിയേറ്റ് ക്യാമറാമാന്‍ സുരേഷ് ഗോപിയാണ് ക്യാമറ കെെകാര്യം ചെയ്തിരിക്കുന്നത്. എഡിറ്റിംഗ് നിര്‍വ്വഹിച്ചിരിക്കുന്നത് സാഗര്‍ ദാസാണ്. ജേക്സ് ബിജോയ് ആണ് സംഗീതം നൽകിയിരിക്കുന്നത്. ചിത്രം അടുത്തവർഷം പ്രദർശനത്തിനെത്തുമെന്നാണ് സൂചന. ഷിബു കെ മൊയ്ദീനും റിന്‍ഷാദ് വെള്ളോടത്തിലും ചേർന്നാണ് ക്വീനിന്റെ നിർമ്മാണം. അറേബിയൻ ഡ്രീംസ് എന്റെർറ്റൈന്മെന്റിന്റെ ബാനറിൽ ആണ് ചിത്രം നിർമ്മിച്ചിരിക്കുന്നത്.