‘സംവിധായകനില്‍ നിന്ന് മൈക്ക് വാങ്ങി അദ്ദേഹം സ്വയം സംവിധാനം ചെയ്തു തുടങ്ങി’; മമ്മൂക്ക തനിക്ക് നൽകിയ ബഹുമതിയെക്കുറിച്ച് ഇനിയ

തമിഴ് മലയാളം സിനിമകളില്‍ സജീവ സാന്നിധ്യമാണ് ‘ഇനിയ’. മമ്മൂട്ടി നായകനായി എത്തുന്ന ‘പരോൾ’ എന്ന ചിത്രത്തിലാണ് ഇനിയ ഇപ്പോൾ അഭിനയിച്ചുകൊണ്ടിരിക്കുന്നത്. മമ്മൂട്ടിയുടെ കൂടെ അഭിനയിക്കുന്നതിലുള്ള സന്തോഷം താരം മുൻപ് വ്യക്തമാക്കിയിരുന്നു. ചിത്രത്തിൽ ഇനിയയ്ക്ക് മമ്മൂട്ടിയുടെ ഭാര്യയുടെ വേഷമാണ്. ഒരു തനി നാടന്‍ കഥാപാത്രത്തെയാണ് ഇനിയ അവതരിപ്പിക്കുന്നത്. ഒരു മാധ്യമത്തിന് നൽകിയ അഭിമുഖത്തിൽ മമ്മൂട്ടിക്കൊപ്പമുള്ള അഭിനയം അവിസ്മരണീയമായിരുന്നുവെന്ന് പറഞ്ഞിരിക്കുകയാണ് ഇനിയ.

ഇനിയയുടെ വാക്കുകളിലൂടെ;

‘തൃശൂരില്‍ നിന്ന് പാലയിലേയ്ക്ക് കുടിയേറിയ ആനി എന്ന കോട്ടയം അച്ചായത്തിയുടെ വേഷമാണ് എനിക്ക്. കല്ല്യാണത്തിന് മുന്‍പ് ബ്ലൗസും പാവാടയുമെല്ലാം ധരിക്കുന്ന ഒരു തനി നാടന്‍ പെണ്‍കുട്ടി. അഭിനയത്തില്‍ മമ്മൂക്ക ഒരുപാട് സഹായിക്കുകയും നിർദേശങ്ങൾ നൽകുകയും ചെയ്‌തിരുന്നു. ഞാനും മമ്മൂക്കയും തമ്മിലുള്ള ഒരു വാദപ്രതിവാദത്തിന്റെ സീനുണ്ട്. സ്വല്‍പം ദൈര്‍ഘ്യമേറിയ ഒരു വൈകാരിക സീനായിരുന്നു അത്. ഷൂട്ടിങ്ങിനിടെ എന്റെ ഒരുപാട് ക്ലോസപ്പ് ഷോട്ടുകള്‍ എടുക്കാൻ പറഞ്ഞു. പിന്നെ ഇടയ്ക്ക് സംവിധായകനില്‍ നിന്ന് മൈക്ക് വാങ്ങി സ്വയം സംവിധാനം ചെയ്യാനും തുടങ്ങി.ഒരാളുടെ പ്രകടനം മനസ്സില്‍ പിടിച്ചാല്‍ മാത്രമേ അദ്ദേഹം അങ്ങനെ ചെയ്യാറുള്ളൂവെന്ന് സെറ്റിലുള്ളവര്‍ എന്നോട് പറഞ്ഞപ്പോൾ ഒരു വലിയ ബഹുമതിയായി തോന്നി’.

മമ്മൂട്ടിയുടെ പുത്തന്‍ പണം എന്ന സിനിമയിലും ഇനിയ അഭിനയിച്ചിരുന്നു. അതിനുശേഷമാണ് പരോളിൽ നായികയാകാനുള്ള അവസരം താരത്തെ തേടിയെത്തിയത്. അജിത് പൂജപ്പുര തിരക്കഥയെഴുതുന്ന ചിത്രം സംവിധാനം ചെയ്യുന്നത് നവാഗതനായ ശരത് സന്ദിത് ആണ്. ബാഹുബലിയുടെ ഒന്നാം ഭാഗത്തില്‍ കാലകേയനായി അഭിനയിച്ച പ്രഭാകറും ചിത്രത്തിൽ വില്ലൻ വേഷത്തിൽ എത്തുന്നുണ്ട്.