ജിമ്മിക്കി കമ്മലിന് ശേഷം മെക്ക് ആന്തവും തരംഗം ആവുന്നു; ക്വീൻ റിലീസിന് തയ്യാറെടുക്കുന്നു..

നവാഗതനായ ഡിജോ ജോസ് ആന്റണി സംവിധാനം ചെയ്ത ക്വീൻ എന്ന ക്യാമ്പസ് മൂവി അധികം വൈകാതെ കേരളത്തിലെ തീയേറ്ററുകളിൽ പ്രദർശനത്തിന് എത്തും. ഒരു കൂട്ടം പുതുമുഖങ്ങളെ അണി നിരത്തി പുതുമുഖങ്ങൾ തന്നെ ഒരുക്കിയ ഈ അടിപൊളി ക്യാമ്പസ് എന്റെർറ്റൈനെർ ഒരു എഞ്ചിനീയറിംഗ് കോളേജിന്റെ പശ്ചാത്തലത്തിൽ ആണ് കഥ പറയുന്നത്.

ഷാരിസ് മുഹമ്മദ്, ജിബിൻ ജോസ് ആന്റണി എന്നിവർ ചേർന്ന് രചിച്ച ഈ ചിത്രം ഇതിനോടകം വലിയ പ്രതീക്ഷകൾ ഉണർത്തിയിട്ടുണ്ട്. രണ്ടു ദിവസം മുൻപ് റിലീസ് ചെയ്ത ഈ ചിത്രത്തിലെ മേക്കിങ് വിഡിയോയും അതിൽ ഉപയോഗിച്ച മെക്ക് ആന്തവും ഇപ്പോൾ സോഷ്യൽ മീഡിയയിൽ തരംഗമായി കഴിഞ്ഞു.

ജിമ്മിക്കി കമ്മലിന് ശേഷം കേരളത്തിലെ യുവാക്കൾ ഏറ്റെടുക്കാൻ പോകുന്ന ഗാനമായി ഈ മേക് ആന്തം മാറുമെന്നാണ് ഇപ്പോഴത്തെ സൂചനകൾ പറയുന്നത്. പ്രേക്ഷകരെ ഈ ചിത്രത്തിനായി കാത്തിരിപ്പിക്കാൻ പ്രേരിപ്പിക്കുന്ന തരത്തിലാണ് മേക്കിങ് വീഡിയോ അണിയറ പ്രവർത്തകർ പുറത്തു വിട്ടിരിക്കുന്നത്.

ഷിബു കെ മൊയ്‌ദീൻ , റിൻഷാദ് വെള്ളോടത്തിൽ എന്നിവർ ചേർന്ന് നിർമ്മിച്ച ക്വീൻ ഈ മാസം തന്നെ പ്രദർശനം ആരംഭിക്കുമെന്നാണ് സൂചന. ജേക്സ് ബിജോയ് സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് കാമറ ചലിപ്പിച്ചിരിക്കുന്നതു ദ്രുവങ്ങള്‍ 16 എന്ന പ്രശസ്ത തമിഴ് സിനിമയുടെ അസോസിയേറ്റ് ക്യാമറാമാന്‍ ആയിരുന്ന സുരേഷ് ഗോപിയാണ് .

സാഗർ ദാസ് ആണ് ഈ ചിത്രത്തിന്റെ എഡിറ്റിംഗ് നിർവഹിച്ചിരിക്കുന്നത്. അറേബിയൻ ഡ്രീംസ് എന്റെർറ്റൈന്മെന്റിന്റെ ബാനറിൽ ആണ് ഈ ചിത്രം നിർമ്മിച്ചിരിക്കുന്നത്. ഏതായാലും റിലീസ് ചെയ്തു ദിവസങ്ങൾക്കുള്ളിൽ ലക്ഷങ്ങൾ കണ്ട ക്വീൻ മേക്കിങ് വീഡിയോ വലിയ പ്രതീക്ഷ തന്നെയാണ് ഈ ചിത്രത്തിന് മേൽ ഉണർത്തിയിരിക്കുന്നതു.