പ്രൊഡ്യൂസർ സോഫിയ പോളിന്റെ മകൻ കെവിന്റെയും ഐമയുടെയും വിവാഹം പുതുവർഷത്തിൽ

‘ജേക്കപ്പിന്‍റെ സ്വർഗ്യരാജ്യ’ത്തിലൂടെ നിവിൻ പോളിയുടെ അനുജത്തിയായും ‘മുന്തിരിവള്ളികൾ തളിർക്കുമ്പോൾ’ എന്ന ചിത്രത്തിലൂടെ മോഹൻലാലിൻറെ മകളായും എത്തി മലയാളികളുടെ മനം കവർന്ന നടിയായ ഐമ സെബാസ്റ്റ്യൻ വിവാഹിതയാകുന്നു. മുന്തിരിവള്ളികൾ തളിർക്കുമ്പോൾ, ബാംഗ്ലൂർ ഡെയ്സ് തുടങ്ങിയ ഹിറ്റ് ചിത്രങ്ങളുടെ നിർമാതാവയ സോഫിയ പോളിന്‍റെ മകൻ കെവിൻ പോളാണ് വരൻ. സിനിമാ മേഖലയില്‍ നിന്നാണ് വരനെങ്കിലും പ്രണയവിവാഹമല്ല.

ഇരുവരുടെയും വിവാഹ വാർത്ത മാധ്യമങ്ങൾ നേരത്തെ തന്നെ റിപ്പോർട്ട് ചെയ്തിരുന്നു. ഇപ്പോൾ കെവിൻ പോൾ തന്നെ തന്റെ ഔദ്യോഗിക ഫേസ്ബുക്ക് അക്കൗണ്ടിലൂടെ വിവാഹത്തീയതി അറിയിച്ചിരിക്കുകയാണ്. 2018 ജനുവരി 4 നാണ് വിവാഹം. കടവൂർ സെയിന്‍റ് കാസിമിർ ദേവാലയത്തിൽ വച്ചാണ് വിവാഹം.

2013 ല്‍ മനു കണ്ണന്താനം സംവിധാനം ചെയ്ത ദൂരം എന്ന സിനിമയിലൂടെയാണ് ഐമ അഭിനയരംഗത്തേക്ക് ചുവടുവെച്ചത്. ഐമയുടെ ഇരട്ട സഹോദരി ഐനയും ഈ ചിത്രത്തിൽ അഭിനയിച്ചിരുന്നു. ജേക്കബിന്റെ സ്വര്‍ഗരാജ്യം, മുന്തിരിവള്ളികള്‍ തളിര്‍ക്കുമ്പോള്‍ എന്നീ ചിത്രങ്ങളിലെ ഐമയുടെ വേഷങ്ങൾ ഏറെ ശ്രദ്ധിക്കപ്പെട്ടു. മണിപ്പാല്‍ സര്‍വകലാശാലയില്‍ എംബിഎ വിദ്യാര്‍ഥിനിയായ ഐമ കുടുംബത്തോടൊപ്പം ഷാർജയിലാണ് താമസം.