ടോവിനോ തോമസ്- മധുപാൽ ചിത്രത്തിന്റെ പുതിയ പോസ്റ്റർ ശ്രദ്ധ നേടുന്നു.

യുവ താരം ടോവിനോ തോമസിനെ നായകനാക്കി പ്രശസ്ത നടനും സംവിധായകനുമായ മധുപാൽ സംവിധാനം ചെയ്യുന്ന ചിത്രമാണ് ഒരു കുപ്രസിദ്ധ പയ്യൻ . ലാൽ- പൃഥ്വിരാജ് ടീമിനെ ഒന്നിപ്പിച്ചു തലപ്പാവ് എന്ന ചിത്രം ഒരുക്കി സംവിധായകനായി അരങ്ങേറിയ മധുപാൽ പിന്നീട് ആസിഫ് അലി- ലാൽ ടീമിനെ വെച് ഒഴിമുറി എന്ന ചിത്രവും ഒരുക്കി ശ്രദ്ധ നേടിയിരുന്നു. മധുപാൽ സംവിധാനം ചെയ്ത രണ്ടു ചിത്രവും ഏറെ ശ്രദ്ധിക്കപ്പെട്ട ചിത്രങ്ങൾ ആണെന്നത് അദ്ദേഹം ടോവിനോ തോമസിനൊപ്പം ചേർന്ന് ചെയ്യുന്ന ഈ പുതിയ ചിത്രത്തിന് മേൽ വമ്പൻ പ്രതീക്ഷകൾ നൽകുന്നു. ഇപ്പോഴിതാ ഈ ചിത്രത്തിന്റെ പുതിയ പോസ്റ്റർ പുറത്തു വന്നിരിക്കുകയാണ്. തൊണ്ടിമുതലും ദൃക്‌സാക്ഷിയും എന്ന ചിത്രത്തിലൂടെ അരങ്ങേറി പ്രേക്ഷക ശ്രദ്ധ നേടിയെടുത്ത നിമിഷ സജയൻ ആണ് ഈ ചിത്രത്തിലെ നായിക ആയി എത്തുന്നത്. ആദ്യ ചിത്രത്തിനു ശേഷം ഷെയിൻ നിഗമിന്റെ നായിക ആയി ഈട എന്ന ചിത്രത്തിലും നിമിഷ അഭിനയിച്ചു. ആ ചിത്രം അടുത്ത മാസം പ്രദർശനത്തിന് എത്തും.

വി സിനിമാസ് നിർമ്മിക്കുന്ന ടോവിനോ തോമസ്- മധുപാൽ ചിത്രം ഒരു മർഡർ മിസ്റ്ററി മൂവി ആണെന്നാണ് സൂചന ലഭിക്കുന്നത്. ജീവൻ ജോബ് തിരക്കഥ ഒരുക്കിയ ഈ ചിത്രത്തിൽ ടോവിനോക്കും നിമിഷക്കും പുറമെ ലിജോമോൾ ജോസ്, ശരണ്യ പൊൻവണ്ണൻ, അലെൻസിയർ, നെടുമുടി വേണു, സുജിത് ശങ്കർ, പശുപതി, സൈജു കുറുപ്പ്, സുധീർ കരമന, ബാലു വർഗീസ് , ജി സുരേഷ് കുമാർ എന്നിവരും അഭിനയിക്കുന്നുണ്ട് എന്നാണ് റിപ്പോർട്ടുകൾ പറയുന്നത്‌. വൈക്കത്തു ചിത്രീകരണം ആരംഭിച്ച ഈ ചിത്രത്തിന്റെ അടുത്ത ഷെഡ്യൂൾ ഫെബ്രുവരിയിൽ ആയിരിക്കും. അടുത്ത വർഷം പകുതിയോടെ ഈ ചിത്രം തീയേറ്ററുകളിൽ എത്തുമെന്നാണ് പ്രതീക്ഷിക്കപ്പെടുന്നത്.

നൗഷാദ് ഷെരീഫ് ദൃശ്യങ്ങൾ ഒരുക്കുന്ന ഈ ചിത്രത്തിന് സംഗീതം പകരുന്നത് ഔസേപ്പച്ചൻ ആണ്. വി സാജൻ ആണ് ഒരു കുപ്രസിദ്ധ പയ്യൻ എഡിറ്റ് ചെയ്യുന്നത്. നമ്മുടെ നാട്ടിൽ നടന്നിട്ടുള്ള കൊലപാതക പരമ്പരകൾ അടിസ്ഥാനമാക്കിയാണ് ഈ ചിത്രം രചിച്ചിരിക്കുന്നത്. ടോവിനോ തോമസിന്റെ പുതിയ റിലീസ് ആയ മായാനദി മികച്ച അഭിപ്രായം നേടി തീയേറ്ററുകളിൽ മുന്നേറുകയാണ് ഇപ്പോൾ. ആഷിക് അബുവാണ് ഈ ചിത്രം ഒരുക്കിയത്.