മോഹൻലാലിന്റെ വഴക്ക് പേടിച്ചു എഴുതിയ ആ രംഗം; സൂപ്പർഹിറ്റ് ചിത്രത്തിലെ ആ സൂപ്പർ കോമഡി സീനിനെ കുറിച്ച് സംവിധായകൻ..!

മലയാള സിനിമയിലെ എന്നു മാത്രമല്ല, ഇന്ത്യൻ സിനിമയിലെ തന്നെ ഏറ്റവും വലിയ സൂപ്പർ ഹിറ്റ് കൂട്ടുകെട്ടാണ് മോഹൻലാൽ- പ്രിയദർശൻ ടീം. മൂന്ന് ഇൻഡസ്ട്രി ഹിറ്റ് ചിത്രങ്ങൾ മലയാളത്തിൽ ഉണ്ടാക്കിയ മറ്റൊരു ടീം ഇല്ല. ചിത്രം, കിലുക്കം, ചന്ദ്രലേഖ എന്ന മൂന്ന് ഇൻഡസ്ട്രി ഹിറ്റുകൾക്ക് പുറമെ ഈ കൂട്ടുകെട്ട് സമ്മാനിച്ച സൂപ്പർ ഹിറ്റ് ചിത്രങ്ങൾ ഏറെ. പൂച്ചക്കൊരു മൂക്കുത്തി, ഹലോ മൈ ഡിയർ റോങ് നമ്പർ, അരം + അരം = കിന്നരം, താളവട്ടം, ആര്യൻ, അഭിമന്യു, വെള്ളാനകളുടെ നാട്, തേന്മാവിൻ കൊമ്പത്, മിന്നാരം, അദ്വൈതം, കാലാപാനി, കാക്കക്കുയിൽ, ഒപ്പം തുടങ്ങിയവ അതിൽ ചിലതാണ്. ഈ കൂട്ടത്തിൽ 1994 ഇൽ റിലീസ് ചെയ്ത് സൂപ്പർ ഹിറ്റായ ചിത്രമാണ് മിന്നാരം. ഈ ചിത്രത്തിലെ ഗാനങ്ങളും, മോഹൻലാൽ- ജഗതി- പപ്പു- ശങ്കരാടി- മണിയൻ പിള്ള രാജു ടീമിന്റെ കോമഡി സീനുകളുമെല്ലാം ഇപ്പോഴും പ്രേക്ഷകർക്കിടയിൽ തരംഗമാണ്.

ഈ ചിത്രത്തിലെ ഏറ്റവും ഹിറ്റായ ഒരു രംഗമാണ് മോഹൻലാൽ- മണിയൻ പിള്ള രാജു ടീമിന്റെ പ്രശസ്തമായ, കുഞ്ഞിന്റെ പേര് മല മല എന്ന ഡയലോഗ് പറയുന്ന സീൻ. ആ രംഗം എഴുതിയതിനെ കുറിച്ചു പൂച്ചക്കൊരു മൂക്കുത്തി റീയൂണിയൻ എന്ന ക്ലബ് ഹൗസ് സംവാദത്തിൽ വെളിപ്പെടുത്തിയിരിക്കുകയാണ് പ്രിയദർശൻ. ആ സീൻ ഷൂട്ട് ചെയ്യേണ്ട ദിവസം രാവിലെ ആയപ്പോഴും ആ രംഗം എഴുതിയിട്ടുണ്ടായിരുന്നില്ല എന്നും, രാവിലെ മോഹൻലാൽ റെഡി ആയി സെറ്റിൽ എത്തുമ്പോൾ സീൻ ഇല്ലാതിരുന്നാൽ ലാൽ തന്നെ വഴക്ക് പറയും എന്ന് പേടിച്ചു, മോഹൻലാലിന്റെ വഴക്ക് കേൾക്കാതിരിക്കാൻ സെറ്റിൽ ഇരുന്നു 15 മിനിറ്റ് കൊണ്ടാണ് ആ രംഗം എഴുതി തീർത്തത് എന്നും പ്രിയദർശൻ പറയുന്നു. ഇപ്പോൾ ആ സിനിമ റിലീസ് ചെയ്ത് 27 വർഷങ്ങൾ ആവുമ്പോഴും ആ രംഗം മലയാള സിനിമാ ചരിത്രത്തിലെ തന്നെ എവർഗ്രീൻ ക്ലാസ്സിക് കോമഡി സീൻ ആയി നിലനിൽക്കുന്നു.