സയ്ദ് മസൂദിന് അബ്രഹാം ഖുറേഷിയുടെ സമ്മാനം; മോഹൻലാലിന് നന്ദി പറഞ്ഞു പൃഥ്വിരാജ് സുകുമാരൻ..!

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ ആദ്യമായി സംവിധാനം ചെയ്ത ചിത്രമാണ് മോഹൻലാൽ നായകനായ ലൂസിഫർ. നൂറു കോടി ക്ലബിൽ ഇടം പിടിച്ചു മഹാവിജയമായി മാറിയ ഈ ചിത്രത്തിൽ സ്റ്റീഫൻ നെടുമ്പള്ളി എന്നും അബ്രഹാം ഖുറേഷി എന്നും പേരുള്ള കഥാപാത്രമായി ആണ് മോഹൻലാൽ അഭിനയിച്ചത്. അബ്രഹാം ഖുറേഷിയുടെ വലം കൈയായ സയ്ദ് മസൂദ് ആയി പൃഥ്വിരാജ് സുകുമാരൻ ഈ ചിത്രത്തിൽ അതിഥി വേഷത്തിലെത്തുകയും ചെയ്തു. ഇപ്പോൾ മോഹൻലാലിനെ തന്നെ നായകനാക്കി ബ്രോ ഡാഡി എന്ന തന്റെ രണ്ടാമത്തെ ചിത്രവും ഒരുക്കി കഴിഞ്ഞിരിക്കുകയാണ് പൃഥ്വിരാജ് സുകുമാരൻ. മോഹൻലാൽ എന്നാൽ തനിക്കു ഏറ്റവും പ്രീയപ്പെട്ട നടൻ മാത്രമല്ല, തന്റെ ജ്യേഷ്ഠനും സുഹൃത്തും വഴികാട്ടിയുമൊക്കെയാണ് എന്ന് പൃഥ്വിരാജ് പറയുന്നു. ഇപ്പോഴിതാ മോഹൻലാൽ തനിക്കു സമ്മാനിച്ച വിലപിടിപ്പുള്ള ഒരു കൂളിംഗ് ഗ്ലാസിന്റെ ചിത്രം പങ്കു വെച്ച് കൊണ്ട് അദ്ദേഹത്തിന് നന്ദി പറയുകയാണ് പൃഥ്വിരാജ്.

ഖുറേഷി അബ്രാം നിങ്ങള്‍ക്ക് ഏറ്റവും മികച്ചത് സമ്മാനിക്കുമ്പോള്‍ എന്ന കുറിപ്പോടെയാണ് പൃഥ്വി ആ ചിത്രം പങ്കു വെച്ചിരിക്കുന്നത്. ഒപ്പം “ചേട്ടന് നന്ദി” എന്നും പൃഥ്വിരാജ് കുറിച്ചിട്ടുണ്ട്. ഖുറേഷി അബ്രഹാം എന്ന കഥാപാത്രം ലുസിഫെറിൽ ഉപയോഗിക്കുന്ന മോഡൽ കൂളിംഗ് ഗ്ലാസ് ആണ് മോഹൻലാൽ പൃഥ്വിരാജ് സുകുമാരന് സമ്മാനിച്ചിരിക്കുന്നതു. ലൂസിഫറിന്റെ വിജയത്തിന് പിന്നാലെ എമ്പുരാന്‍ എന്ന രണ്ടാം ഭാഗവും പൃഥ്വിരാജ് പ്രഖ്യാപിച്ചിട്ടുണ്ട്. മുരളി ഗോപി രചിക്കുന്ന ഈ ചിത്രം അടുത്ത വർഷം ആരംഭിക്കും. ഇത് കൂടാതെ ഒരു മൂന്നാം ഭാഗവും കൂടി ഈ ചിത്രത്തിന് ഉണ്ടാകുമെന്നും പൃഥ്വിരാജ്- മുരളി ഗോപി ടീം അറിയിച്ചിട്ടുണ്ട്.