മമ്മൂക്ക തന്ന ആ ഡേറ്റ്; ചിത്രം എപ്പോൾ ഉണ്ടാകും; വെളിപ്പെടുത്തി പൃഥ്വിരാജ്..!

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ ഇപ്പോൾ ഒരു സൂപ്പർ ഹിറ്റ് സംവിധായകൻ കൂടിയാണ്. അദ്ദേഹം ആദ്യമായി ഒരുക്കിയ ലൂസിഫർ നൂറു കോടി ക്ലബിൽ ഇടം പിടിച്ച ചിത്രമാണ്. കംപ്ലീറ്റ് ആക്ടർ മോഹൻലാൽ ആയിരുന്നു അതിൽ നായകൻ. പൃഥ്വിരാജ് രണ്ടാമത് ഒരുക്കിയ ചിത്രത്തിലും നായകൻ മോഹൻലാൽ ആയിരുന്നു. ബ്രോ ഡാഡി എന്ന ഈ ചിത്രം ഒടിടി റിലീസ് ആയി എത്തിയാണ് സൂപ്പർ വിജയം നേടിയത്. ഇനി പൃഥ്വിരാജ് ഒരുക്കാൻ പോകുന്ന മൂന്നാമത്തെ ചിത്രത്തിലും നായകൻ മോഹൻലാൽ ആണ്. ലൂസിഫറിന്റെ രണ്ടാം ഭാഗമാണ് ഈ ചിത്രം. അതിനു ശേഷം മോഹൻലാൽ തന്നെ നായകനാവുന്ന ലൂസിഫർ മൂന്നാം ഭാഗവും പൃഥ്വിരാജ് ഒരുക്കും. എന്നാൽ മമ്മൂട്ടിയുമായി എപ്പോഴാണ് പൃഥ്വിരാജ് ഒരു ചിത്രം ഒരുക്കുക എന്നതാണ് മമ്മൂട്ടി ആരാധകരുടെ ചോദ്യം.

മമ്മൂട്ടിയുമായി ഒരു ചിത്രം ഒരുക്കണമെന്ന് തനിക്കു ആഗ്രഹമുണ്ടെന്ന് പൃഥ്വിരാജ് പറഞ്ഞിരുന്നു. ലൂസിഫറിന്റെ ട്രൈലെർ ഒക്കെ ലോഞ്ച് ചെയ്ത സമയത്തു ഒരു വേദിയിൽ വെച്ച്, ഇനി മമ്മൂക്കയുടെ ഒരു ഡേറ്റ് വേണം എന്ന് പൃഥ്വിരാജ് പറഞ്ഞപ്പോൾ, അതൊക്കെ എപ്പോഴേ കൊടുത്തു എന്ന് മമ്മൂട്ടി പറഞ്ഞിരുന്നു. ആ ചിത്രം എപ്പോൾ ഉണ്ടാകുമെന്നാണ് ഓൺലൂകേർസ് മീഡിയയുമായി നടത്തിയ അഭിമുഖത്തിൽ പൃഥ്വിരാജ് മറുപടി പറയുന്നത്. അതിന്റെ ഒരു കഥ തനിക്കു അറിയാം എന്നും മുരളി ഗോപി ആണ് അത് എഴുതുക എന്നും പൃഥ്വിരാജ് പറഞ്ഞു. എന്നാൽ അതിന്റെ തിരക്കഥയും മറ്റും ഒന്നും ആയിട്ടില്ല എന്നും അതൊക്കെ സംഭവിച്ചു കഴിഞ്ഞു, തന്റെ തിരക്കുകൾ എല്ലാം തീർന്നു കഴിയുമ്പോൾ മാത്രമേ ആ ചിത്രം നടക്കാൻ സാധ്യത ഉള്ളു എന്നാണ് പൃഥ്വിരാജ് വെളിപ്പെടുത്തുന്നത്. ലൂസിഫർ രണ്ടും മൂന്നും ഭാഗങ്ങൾ സംവിധാനം ചെയ്യുന്നത് കൂടാതെ ഒട്ടേറെ വലിയ ചിത്രങ്ങൾ ആണ് ഒരു നടനെന്ന നിലയിൽ കൂടി പൃഥ്വിരാജ് സുകുമാരന് തീർക്കാനുള്ളത്.