നന്ദി മമ്മൂക്ക; മെഗാ സ്റ്റാർ മമ്മൂട്ടിക്ക് നന്ദി പറഞ്ഞു പ്രധാന മന്ത്രി നരേന്ദ്ര മോദി

ഈ കഴിഞ്ഞ ഞായറാഴ്ച ആയിരുന്നു കൊറോണ വൈറസിനെതിരെ പോരാടുന്ന ഇന്ത്യയുടെ ഐക്യം പ്രകടിപ്പിക്കാൻ പ്രധാന മന്ത്രി നരേന്ദ്ര മോദിയുടെ നിർദേശ പ്രകാരം ഇന്ത്യൻ ജനത ഐക്യ ദീപം തെളിയിച്ചത്. പ്രധാന മന്ത്രി നടത്തിയ ആഹ്വാനത്തിന് പിന്തുണ നല്‍കിയ മലയാളത്തിന്റെ മെഗാ സ്റ്റാർ മമ്മൂട്ടിക്ക് നന്ദി പറഞ്ഞ് പ്രധാനമന്ത്രി നരേന്ദ്ര മോഡി ഇട്ട ട്വീറ്റ് ഇപ്പോൾ ഏറെ ശ്രദ്ധ നേടുകയാണ്. പ്രധാനമന്ത്രിയുടെ ആഹ്വാനം വന്നതിനു പിന്നാലെയാണ് മെഗാസ്റ്റാര്‍ മമ്മൂട്ടി ദീപം തെളിയിക്കല്‍ ആഹ്വാനത്തിന് പിന്തുണ അറിയിച്ചു കൊണ്ടുള്ള വീഡിയോ തന്റെ സോഷ്യൽ മീഡിയ അക്കൗണ്ട് വഴി പോസ്റ്റ് ചെയ്തത്.നരേന്ദ്ര മോഡി മമ്മൂട്ടിയുടെ ട്വീറ്റിന് റീ ട്വീറ്റ് ചെയ്ത് നന്ദി അറിയിക്കുകയും ചെയ്തു. നേരത്തെ പ്രധാനമന്ത്രിയുടെ സ്വച്ഛ് ഭാരത്, ജനത കർഫ്യു എന്നീ പരിപാടികൾക്കും മമ്മൂട്ടി സോഷ്യൽ മീഡിയ വഴി പിന്തുണ നൽകിയിരുന്നു.

മമ്മൂട്ടിക്ക് നന്ദി പറഞ്ഞു കൊണ്ടുള്ള മോദിയുടെ വാക്കുകൾ ഇപ്രകാരം, നന്ദി, മമ്മൂക്ക. ഐക്യത്തിനും സാഹോദര്യത്തിനും വേണ്ടിയുള്ള നിങ്ങളെപ്പോലുള്ളവരുടെ ഹൃദയംഗമമായ ആഹ്വാനമാണ് കോവിഡ് 19 ന് എതിരായ പോരാട്ടത്തില്‍ നമ്മുടെ രാജ്യത്തിന് വേണ്ടത്. ഈ നന്ദി വാക്കുകൾക്കൊപ്പം മമ്മൂട്ടി ഐക്യ ദീപത്തിനു പിന്തുണ നൽകുന്ന വീഡിയോയും മോഡി ട്വീറ്റ് ചെയ്തിട്ടുണ്ട് എന്നതും ശ്രദ്ധേയമാണ്. മമ്മൂട്ടിയും മകൻ ദുൽഖർ സൽമാനുമെല്ലാം ഞായറാഴ്ച രാത്രി ഒൻപതു മണിക്ക് വീട്ടിൽ ദീപം തെളിച്ചിരുന്നു. മോഹൻലാൽ, സച്ചിൻ ടെണ്ടുൽക്കർ, അമിതാബ് ബച്ചൻ, അക്ഷയ് കുമാർ, മഹേഷ് ബാബു, അല്ലു അർജുൻ, രജനികാന്ത്, രോഹിത് ശർമ്മ, വിരാട് കൊഹ്‌ലി തുടങ്ങി ഒട്ടേറെ പ്രശസ്തർ അന്നേ ദിവസം ഐക്യ ദീപം തെളിയിച്ചു.