പ്രണവും ധ്യാനും ഒപ്പം ഒരു നിവിൻ പോളി ഷോയും; വർഷങ്ങൾക്ക് ശേഷത്തെ കുറിച്ച് വെളിപ്പെടുത്തി പ്രശസ്ത താരം

പ്രണവ് മോഹൻലാൽ- ധ്യാൻ ശ്രീനിവാസൻ ടീമിനെ കേന്ദ്ര കഥാപാത്രങ്ങളാക്കി വിനീത് ശ്രീനിവാസൻ സംവിധാനം ചെയ്ത ചിത്രമാണ് വർഷങ്ങൾക്ക് ശേഷം. ഈ വർഷം ഏപ്രിൽ പതിനൊന്നിന് റിലീസ് ചെയ്യാൻ പോകുന്ന ചിത്രത്തിലെ താരനിരയെ പരിചയപ്പെടുത്തുന്ന ഒരു ടീസർ അണിയറ പ്രവർത്തകർ പുറത്ത് വിട്ടിരുന്നു. പ്രണവ് മോഹൻലാൽ, ധ്യാൻ ശ്രീനിവാസൻ എന്നിവർക്കൊപ്പം ബേസിൽ ജോസഫ്, നീരജ് മാധവ്, കല്യാണി പ്രിയദർശൻ, വിനീത് ശ്രീനിവാസൻ, അജു വർഗീസ്, ഷാൻ റഹ്മാൻ, നീത പിള്ളൈ, നിഖിൽ നായർ, അർജുൻ ലാൽ, അശ്വത് ലാൽ, ദീപക് പറമ്പൊൾ, വൈ ജി മഹേന്ദ്ര, ഭഗത് മാനുവൽ, ഹരികൃഷ്ണൻ, കലേഷ് രാമാനന്ദ്, പൊള്ളാച്ചി രാജ, ഫാഹിം സഫർ, വിജയലക്ഷ്മി, ബിജു സോപാനം, രേഷ്മ സെബാസ്റ്റ്യൻ, ഉണ്ണി രാജ, ദർശന സുദർശൻ, കൃഷ്ണചന്ദ്രൻ, ശ്രീറാം രാമചന്ദ്രൻ, അഞ്ജലി നായർ, എ ആർ രാജ ഗണേഷ്, നന്ദു പൊതുവാൾ, ടി എസ് ആർ എന്നിവരും ഇതിന്റെ താരനിരയിലുണ്ട്.

മെരിലാൻഡ് സിനിമാസിന്റെ ബാനറിൽ വിശാഖ് സുബ്രമണ്യം നിർമ്മിച്ച ഈ ചിത്രത്തെ കുറിച്ച് നടൻ അജു വർഗീസ് നടത്തിയ പരാമർശമാണ് ഇപ്പോൾ ശ്രദ്ധ നേടുന്നത്. പ്രണവ്, ധ്യാൻ എന്നിവർ മികച്ച പ്രകടനമാണ് ഇതിൽ കാഴ്ചവെച്ചിരിക്കുന്നതെങ്കിലും, അതിഥി വേഷം ചെയ്ത നിവിൻ പോളി തന്റെ സീനുകളിൽ ഗംഭീര പ്രകടനമാണ് നടത്തിയിരിക്കുന്നതെന്ന് അജു വർഗീസ് പറയുന്നു. താൻ ഡബ്ബ് ചെയ്തപ്പോൾ നിവിന്റെ കുറെ സീനുകൾ കണ്ടെന്നും ഒരു നിവിൻ പോളി ഷോ തന്നെ പ്രേക്ഷകർക്ക് കാണാമെന്നും അജു വെളിപ്പെടുത്തി. ധ്യാൻ ശ്രീനിവാസൻ എന്ന നടന്റെ കരിയർ ബെസ്റ്റ് പെർഫോമൻസും ഇതിൽ കാണാമെന്നും അജു വർഗീസ് പറഞ്ഞു. ഹൃദയം എന്ന ബ്ലോക്ക്ബസ്റ്റർ ചിത്രത്തിന് ശേഷം പ്രണവ് മോഹൻലാൽ- വിനീത് ശ്രീനിവാസൻ ടീമൊന്നിച്ച ഈ ചിത്രം പഴയകാല മദിരാശി പട്ടണത്തിന്റെ പശ്‌ചാത്തലത്തിലാണ്‌ കഥ പറയുന്നത്.