ഖുറേഷിക്കും മസൂദിനും നൃത്തം ചെയ്യാൻ ആറ്റം ബോംബ് ഗാനവുമായി തമൻ-പ്രഭുദേവ ടീം..!

മലയാത്തിലെ മെഗാ ബ്ലോക്ക്ബസ്റ്റർ ചിത്രമായ ലൂസിഫർ ഇപ്പോൾ തെലുങ്കിലേക്ക് റീമേക് ചെയ്യുകയാണ്. കംപ്ലീറ്റ് ആക്ടർ മോഹൻലാൽ നായകനായ ഈ ചിത്രം മലയാളത്തിലൊരുക്കിയത് പൃഥ്വിരാജ് സുകുമാരനാണ്, തെലുങ്കിൽ ഗോഡ്ഫാദർ എന്ന പേരിൽ ഈ ചിത്രമൊരുക്കുന്നത് സൂപ്പർ ഹിറ്റ് തമിഴ് സംവിധായകനായ മോഹൻ രാജയാണ്. മോഹൻലാൽ ചെയ്ത ടൈറ്റിൽ റോൾ തെലുങ്കിൽ മെഗാ സ്റ്റാർ ചിരഞ്ജീവി ചെയ്യുമ്പോൾ, പൃഥ്വിരാജ് അവതരിപ്പിച്ച അതിഥി വേഷം തെലുങ്കിൽ ചെയ്യുന്നത് ബോളിവുഡ് മെഗാ സ്റ്റാർ സൽമാൻ ഖാനാണ്. ഇപ്പോഴിതാ ഈ ചിത്രത്തിലെ ഒരു ഗാനരംഗത്തേക്കുറിച്ച് പുറത്തു വരുന്ന വാർത്തകൾ ആരാധകരെ ആവേശം കൊള്ളിക്കുകയാണ്. എസ് തമൻ സംഗീത സംവിധാനം നിർവഹിക്കുന്ന ഈ ഗാനത്തിന് നൃത്ത സംവിധാനം നിർവഹിക്കാൻ പോകുന്നത് പ്രഭുദേവയാണ്.

ഈ ഗാനരംഗത്തിൽ ചിരഞ്ജീവിയും ബോളിവുഡ് സൂപ്പർ സ്റ്റാർ സൽമാൻ ഖാനും ഒരുമിച്ചെത്തും എന്നാണ് ഇപ്പോൾ വരുന്ന വാർത്തകൾ പറയുന്നത്. സംഗീത സംവിധായകൻ തമൻ തന്റെ ഔദ്യോഗിക ട്വിറ്റർ പേജിലൂടെയാണ് ഈ വിവരം പങ്കു വെച്ചിരിക്കുന്നത്. ആറ്റം ബോംബിങ് സ്വിങ്ങിങ് സോങ് എന്നാണ് ഈ ഗാനത്തിന്റെ അദ്ദേഹം വിശേഷിപ്പിച്ചിരിക്കുന്നത്. ഹൈദരാബാദിൽ ഈ ഗാനരംഗത്തിന്റെ ചിത്രീകരണം ഉടൻ ആരംഭിക്കുമെന്നാണ് സൂചന. മലയാളത്തിൽ മഞ്ജു വാര്യർ അവതരിപ്പിച്ച നായികാ വേഷം തെലുങ്കിൽ ചെയ്യുന്നത് ലേഡി സൂപ്പർ സ്റ്റാർ നയൻതാരയാണ്. തന്റെ സ്വന്തം നിർമ്മാണ ബാനറിൽ ചിരഞ്ജീവി തന്നെയാണ് ഈ ചിത്രം നിർമ്മിക്കുന്നതും. അദ്ദേഹത്തിന്റെ ഏറ്റവും പുതിയ റിലീസ്, കൊരടാല ശിവ ഒരുക്കിയ ആചാര്യയായിരുന്നു. മകൻ റാം ചരണും കൂടെയെത്തിയ ഈ ചിരഞ്ജീവി ചിത്രം പക്ഷെ ബോക്സ് ഓഫീസിൽ തകർന്നു എന്ന റിപ്പോർട്ടുകളാണ് വരുന്നത്.