ദളപതിയുടെ കത്തി, തെരി ചിത്രങ്ങളുടെ ക്യാമറാമാൻ സുരേഷ് ഗോപി ചിത്രത്തിലൂടെ മലയാളത്തിൽ..!

മലയാളത്തിന്റെ ആക്ഷൻ സൂപ്പർ സ്റ്റാർ സുരേഷ് ഗോപി ഒരുപിടി മാസ്സ് ചിത്രങ്ങളിലൂടെ വമ്പൻ തിരിച്ചു വരവിനു ആണ് ഒരുങ്ങുന്നത്. അതിൽ ആദ്യം എത്തുന്നത് നിതിൻ രഞ്ജി പണിക്കർ ഒരുക്കിയ കാവൽ ആണ്. നവംബർ അവസാന വാരം ഈ ചിത്രം റിലീസ് ചെയ്യും. അതിനു ശേഷം എത്തുന്നത് ജോഷി ഒരുക്കുന്ന പാപ്പൻ എന്ന ചിത്രമാണ്. അതിൽ സുരേഷ് ഗോപിക്ക് ഒപ്പം മകൻ ഗോകുൽ സുരേഷും അഭിനയിക്കുന്നുണ്ട്. മൂന്നാമത് എത്തുക, ഒറ്റക്കൊമ്പൻ എന്ന മാസ്സ് ചിത്രമാണ്. നവാഗതനായ മാത്യൂസ് തോമസ് ആണ് ഒറ്റക്കൊമ്പൻ സംവിധാനം ചെയ്യുന്നത്. സുരേഷ് ഗോപിയുടെ കരിയറിലെ ഇരുന്നൂറ്റിയന്പതാമത്തെ ചിത്രമായി പ്രഖ്യാപിക്കപ്പെട്ട ഈ ചിത്രം രചിച്ചിരിക്കുന്നത് ഷിബിൻ ഫ്രാൻസിസ് ആണെങ്കിൽ, നിർമ്മിക്കുന്നത് ടോമിച്ചൻ മുളകുപാടം ആണ്. അതിനു ശേഷം വരുന്ന സുരേഷ് ഗോപി ചിത്രമാണ് ഇപ്പോൾ വാർത്തകളിൽ നിറയുന്നത്. അദ്ദേഹത്തിന്റെ 251 ആം ചിത്രമായി പ്രഖ്യാപിക്കപ്പെട്ട ഈ ചിത്രം സംവിധാനം ചെയ്യാൻ പോകുന്നത് രാഹുൽ രാമചന്ദ്രൻ ആണ്.

ഈ ചിത്രത്തിന് ക്യാമറ ചലിപ്പിക്കാൻ പോകുന്നത്, കത്തി, തെരി, ഹീറോ, ഇരുമ്പു തിരൈ, രാജാ റാണി, ഇനി ഷൂട്ട് തുടങ്ങാൻ പോകുന്ന കാർത്തിയുടെ സർദാർ എന്നീ ചിത്രങ്ങളുടെ ക്യാമറാമാൻ ആയ ജോർജ് സി വില്യംസ് ആണ്. അദ്ദേഹം ക്യാമറ ചലിപ്പിക്കാൻ എത്തുന്നത് കൊണ്ട് തന്നെ പേരിടാത്ത ഈ സുരേഷ് ഗോപി ചിത്രം ഒരു വമ്പൻ ചിത്രമാകും എന്നാണ് സൂചന. ചിത്രത്തിൽ വമ്പൻ താരനിര അണിനിരക്കും എന്നും റിപ്പോർട്ടുകൾ വരുന്നുണ്ട്. ഈ ചിത്രത്തിന്റെ അനൗൺസ്‌മെന്റ് പോസ്റ്ററും അതിലെ സുരേഷ് ഗോപിയുടെ ലുക്കും സൂപ്പർ ഹിറ്റായി മാറിയിരുന്നു. ഒരു ത്രില്ലർ ആണ് ഈ ചിത്രമെന്നാണ് സൂചന.