ആദ്യ സംവിധാന സംരംഭം തന്നെ വമ്പൻ ഹിറ്റിലേക്ക്; പത്രോസിന്റെ പടപ്പുകൾ എന്ന ചിത്രത്തിന് എങ്ങും മികച്ച പ്രതികരണം..!

കഴിഞ്ഞ ദിവസം മലയാളത്തിൽ റിലീസ് ചെയ്ത ചിത്രങ്ങളിൽ ഒന്നാണ് നവാഗതനായ അഫ്സൽ അബ്ദുൽ ലത്തീഫ് സംവിധാനം ചെയ്ത പത്രോസിന്റെ പടപ്പുകൾ. തണ്ണീർമത്തൻ ദിനങ്ങൾ എന്ന വൻ വിജയത്തിന് ശേഷം ഡിനോയ്‌ പൗലോസ് തിരക്കഥ ഒരുക്കി നായകനും ആയി അഭിനയിച്ച ഈ ചിത്രത്തിൽ ജെയിംസ് ഏലിയാ, ഷറഫുദീൻ, നസ്ലെൻ, ഗ്രേസ് ആന്റണി, ജോണി ആന്റണി, സുരേഷ് കൃഷ്ണ, എം ആർ ഗോപകുമാർ, ശബരീഷ് വർമ്മ, രഞ്ജിത മേനോൻ, നന്ദു എന്നിവരും അഭിനയിച്ചിട്ടുണ്ട്. പ്രേക്ഷകരെ പൊട്ടിച്ചിരിപ്പിക്കുന്ന ഈ ചിത്രത്തിന് മികച്ച അഭിപ്രായം ആണ് ഇപ്പോൾ ലഭിച്ചു കൊണ്ടിരിക്കുന്നത്. ആദ്യ സംവിധാന സംരംഭം തന്നെ വലിയ ഹിറ്റായി മാറിയ സന്തോഷത്തിലാണ് സംവിധായകൻ അഫ്സൽ അബ്ദുൽ ലത്തീഫ്. എഴുത്തുക്കാരനായും സംവിധായകനായും സീരിയൽ ലോകത്ത് നിരവധി വർഷത്തെ പ്രാഗൽഭ്യം തെളിയിച്ച ആളാണ് അദ്ദേഹം.

തിരക്കഥാകൃത്തായി സിനിമയിൽ തുടക്കം കുറിച്ച അഫ്സൽ ആണ്, എസ് ജെ സിനു സംവിധാനം ചെയ്ത് അമിത് ചക്കാലക്കൽ നായകനായ ‘ജിബൂട്ടി’ എന്ന ചിത്രം രചിച്ചത്. കഴിഞ്ഞ വർഷമാണ് ഈ ചിത്രം എത്തിയത്. മറിമായം, ഉപ്പും മുളകും എന്നീ സൂപ്പർ ഹിറ്റ് കോമഡി ടെലിവിഷൻ പരമ്പരകൾ രചിച്ചതും അഫ്സൽ അബ്ദുൽ ലത്തീഫ് ആണ്. കൊച്ചി-വൈപ്പിൻ പ്രദേശത്ത് നടക്കുന്ന വളരെ ഹൃദ്യമായ ഒരു ഹാസ്യ കുടുംബ ചിത്രം ആണ് പത്രോസിന്റെ പടപ്പുകൾ. മരിക്കാർ എൻ്റർടെയ്ൻമെൻസിൻ്റെ ബാനറിൽ ആണ് ഈ ചിത്രം നിർമ്മിച്ചിരിക്കുന്നത്. ജേക്സ് ബിജോയ് സംഗീതമൊരുക്കിയ ഈ ചിത്രത്തിന് കാമറ ചലിപ്പിച്ചത് ജയേഷ് മോഹനും എഡിറ്റ് ചെയ്തത് സംഗീത് പ്രതാപും ആണ്. ഒരു ചിരി വിരുന്നു തന്നെ പ്രേക്ഷകന് സമ്മാനിച്ച് കൊണ്ടാണ് ഈ ചിത്രം പ്രദർശനം തുടരുന്നത്.