അയ്യപ്പൻ നായരെ വെല്ലുമോ അമ്മിണി പിള്ള?; ബിജു മേനോന്റെ ഒരു തെക്കൻ തല്ല് കേസ് ഇന്ന് മുതൽ; തിയേറ്റർ ലിസ്റ്റ് ഇതാ

ഇത്തവണത്തെ ഓണം റിലീസുകളില്‍ പ്രേക്ഷകർ ഏറ്റവും കൂടുതൽ കാത്തിരിക്കുന്ന ചിത്രങ്ങളിൽ ഒന്നാണ് ബിജു മേനോൻ നായകനായി എത്തുന്ന ഒരു തെക്കൻ തല്ല് കേസ്. ജി ആർ ഇന്ദുഗോപന്‍റെ അമ്മിണിപ്പിള്ള വെട്ടുകേസ് എന്ന കഥയെ ആസ്പദമാക്കിയുള്ള ചിത്രം സംവിധാനം ചെയ്തിരിക്കുന്നത് നവാഗതനായ ശ്രീജിത്ത് എന്‍ ആണ്. കംപ്ലീറ്റ് ആക്ടർ മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്‍ത ബ്രോ ഡാഡിയുടെ തിരക്കഥാകൃത്തുക്കളിൽ ഒരാളാണ് ശ്രീജിത്ത്. ഒരു മാസ്സ് എന്റെർറ്റൈനെർ ആയാണ് ഒരു തെക്കൻ തല്ല് കേസ് ഒരുക്കിയിരിക്കുന്നതെന്നാണ് ഇതിന്റെ ട്രൈലെർ കാണിച്ചു തരുന്നത്. അത്കൊണ്ട് തന്നെ അമ്മിണി പിള്ള എന്ന നായക കഥാപാത്രമായി ബിജു മേനോന്റെ മാസ്സ് പ്രകടനം കാണാനാണ് പ്രേക്ഷകർ കാത്തിരിക്കുന്നത്. അയ്യപ്പനും കോശിയുമെന്ന ചിത്രത്തിലെ അയ്യപ്പൻ നായർക്ക് ശേഷം വീണ്ടും മാസ്സ് കഥാപാത്രമായി ബിജു മേനോൻ നിറഞ്ഞാടുന്ന കഥാപാത്രമായിരിക്കും അമ്മിണി പിള്ളയെന്നാണ് സൂചന. രാജേഷ് പിന്നാടനാണ്‌ ഈ ചിത്രത്തിന് തിരക്കഥ രചിച്ചിരിക്കുന്നത്.

ഇന്ന് തിരുവോണ ദിനത്തിൽ പ്രേക്ഷകരുടെ മുന്നിലെത്തുന്ന ഈ ചിത്രത്തിന്റെ തിയേറ്റർ ലിസ്റ്റ് ഇവിടെ ചേർക്കുന്നു. കേരളത്തിൽ വമ്പൻ റിലീസാണ് ഒരു തെക്കൻ തല്ല് കേസിനു ലഭിച്ചിരിക്കുന്നത്. മികച്ച അഡ്വാൻസ് ബുക്കിങ്ങും നേടാൻ ഈ സിനിമയ്ക്കു സാധിച്ചിട്ടുണ്ട്. ബിജു മേനോനൊപ്പം, റോഷൻ മാത്യു, പത്മപ്രിയ, നിമിഷ സജയൻ എന്നിവരുൾപ്പെടെയുള്ള പ്രശസ്ത താരങ്ങൾ അണിനിരക്കുന്ന ഒരു തെക്കൻ തല്ല് കേസ് ഇ ഫോർ എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്തയും സി.വി. സാരഥിയും, ന്യൂ സൂര്യ ഫിലിംസിന്റെ ബാനറിൽ സുനിൽ എ കെയും ചേർന്നാണ് നിർമ്മിച്ചിരിക്കുന്നത്. ജസ്റ്റിൻ വർഗീസാണ് ഒരു തെക്കൻ തല്ല് കേസിന്റെ സംഗീത സംവിധായകൻ. അഖിൽ കവലയൂർ, അശ്വത് ലാൽ, റിജു ശിവദാസ്, അരുൺ പാവുമ്പ, അസീസ് നെടുമങ്ങാട്, പ്രമോദ് വെളിയനാട്, പ്രശാന്ത് മുരളി, അച്യുതാന്ദൻ, ശശി വാളൂരാൻ, നീരജ രാജേന്ദ്രൻ, ജയരാജ് എന്നിവരും വേഷമിട്ട ഈ ചിത്രത്തിന് ക്യാമറ ചലിപ്പിച്ചത് മധു നീലകണ്ഠൻ, എഡിറ്റ് ചെയ്തത് മനോജ് കണ്ണോത് എന്നിവരാണ്.