ഓണത്തല്ല് കാണാൻ പ്രേക്ഷകർ; അടിയുടെ പൊടിപൂരവുമായി അമ്മിണിപ്പിള്ള; ഒരു തെക്കൻ തല്ല് കേസ് വരുന്നു

ജനപ്രിയ താരം ബിജു മേനോൻ നായകനായി എത്തുന്ന ഏറ്റവും പുതിയ ചിത്രമാണ് ഒരു തെക്കൻ തല്ല് കേസ്. രണ്ട് ദിവസം മുൻപ് റിലീസ് ചെയ്ത ഇതിന്റെ ട്രൈലെർ ഇപ്പോൾ സൂപ്പർ ഹിറ്റാണ്. ആദ്യാവസാനം ത്രസിപ്പിക്കുന്ന ആക്ഷൻ നിറഞ്ഞ ഒരു മാസ്സ് എന്റർടൈനറാണ് ഈ ചിത്രമെന്ന സൂചനയാണ് ഇതിന്റെ ട്രൈലെർ നൽകുന്നത്. ട്രെയിലറിലെ ആക്ഷൻ സീനുകളും കിടിലൻ ഡയലോഗുകളും പ്രേക്ഷകരെ കുറച്ചൊന്നുമല്ല ആവേശം കൊള്ളിച്ചത്. ഇത്തവണ ഓണത്തല്ല് സ്പോൺസർ ചെയ്തിരിക്കുന്നത് ബിജു മേനോൻ കഥാപാത്രമായ അമ്മിണിപ്പിള്ളയാണെന്നാണ് പ്രേക്ഷകർ അഭിപ്രായപ്പെടുന്നത്. ആക്ഷൻ, കോമഡി, പ്രണയം, ത്രില്ലിങ്ങായ നിമിഷങ്ങൾ എന്നിവയെല്ലാം കൂട്ടിയിണക്കിയ ഒരു കംപ്ലീറ്റ് ഉത്സവകാല വിനോദ ചിത്രമാണ് ഒരു തെക്കൻ തല്ല് കേസ് എന്നത് ഈ ചിത്രത്തിന് കൊടുക്കുന്ന ഹൈപ്പ് വളരെ വലുതാണ്. ഓണം റിലീസായി സെപ്റ്റംബർ എട്ടിനാണ് ഈ ചിത്രം റിലീസ് ചെയ്യാൻ പോകുന്നത്.

ജി.ആർ. ഇന്ദുഗോപൻ രചിച്ച അമ്മിണിപ്പിള്ള വെട്ടുകേസ് എന്ന പുസ്തകത്തെ അധികരിച്ചു കൊണ്ട് രാജേഷ് പിന്നാടൻ തിരക്കഥ രചിച്ച ഈ ചിത്രം സംവിധാനം ചെയ്തിരിക്കുന്നത് നവാഗതനായ ശ്രീജിത്ത് എൻ ആണ്. റോഷൻ മാത്യു, പത്മപ്രിയ, നിമിഷ സജയൻ, അഖിൽ കവലയൂർ, അശ്വത് ലാൽ, റിജു ശിവദാസ്, അരുൺ പാവുമ്പ, അസീസ് നെടുമങ്ങാട്, പ്രമോദ് വെളിയനാട്, പ്രശാന്ത് മുരളി, അച്യുതാന്ദൻ, ശശി വാളൂരാൻ, നീരജ രാജേന്ദ്രൻ, ജയരാജ് എന്നിവരും വേഷമിട്ടിരിക്കുന്ന ഈ ചിത്രത്തിന് ക്യാമറ ചലിപ്പിച്ചത് മധു നീലകണ്ഠൻ, എഡിറ്റ് ചെയ്തത് മനോജ് കണ്ണോത്, സംഗീതമൊരുക്കിയത് ജസ്റ്റിൻ വർഗീസ് എന്നിവരാണ്. ന്യൂ സൂര്യ ഫിലിംസിന്റെ ബാനറിൽ സുനിൽ എ കെയും, ഇ ഫോർ എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്തയും സി.വി. സാരഥിയും ചേർന്നു നിർമ്മിച്ച ഈ ചിത്രം ഇവിടെ വിതരണം ചെയ്യുന്നതും ന്യൂ സൂര്യ ഫിലിംസാണ്.