ഒരു കുപ്രസിദ്ധ പയ്യൻ ഒരു ഇമോഷണൽ ത്രില്ലെർ; പറയുന്നത് സാമൂഹിക പ്രസക്തിയുള്ള വിഷയം എന്ന് നിമിഷ സജയൻ..!

വരുന്ന നവംബർ ഒൻപതിന് കേരളത്തിൽ റിലീസ് ചെയ്യാൻ പോകുന്ന ചിത്രമാണ് ഒരു കുപ്രസിദ്ധ പയ്യൻ. മധുപാൽ സംവിധാനം ചെയ്ത ഈ ചിത്രം രചിച്ചിരിക്കുന്നത് ജീവൻ ജോബും നിർമ്മിച്ചിരിക്കുന്നത് വി സിനിമാസും ആണ്. ഇതിന്റെ ട്രൈലെർ, ഗാനങ്ങൾ, പോസ്റ്ററുകൾ എന്നിവ ഇപ്പോൾ തന്നെ വലിയ പ്രേക്ഷക ശ്രദ്ധ നേടിയെടുത്തിട്ടുണ്ട്. ഈ ചിത്രത്തെ കുറിച്ച് കൂടുതൽ കാര്യങ്ങൾ പ്രേക്ഷകരോട് പറയുകയാണ് ഇതിലെ നായികമാരിൽ ഒരാളായ നിമിഷ സജയൻ. ഒരു കുപ്രസിദ്ധ പയ്യൻ എന്ന ചിത്രം ഒരു ഇമോഷണൽ ത്രില്ലെർ ആണെന്നാണ് നിമിഷ പറയുന്നത്. ഇന്ന് നമ്മുടെ സമൂഹത്തിൽ നടക്കുന്ന ഏറ്റവും പ്രാധാന്യമുള്ള വിഷയങ്ങൾ തന്നെയാണ് ഈ ചിത്രത്തിൽ ചർച്ച ചെയ്യുന്നത് എന്നും നിമിഷ പറയുന്നു.

ടോവിനോ തോമസ് അവതരിപ്പിക്കുന്ന അജയൻ എന്ന കഥാപാത്രത്തിന് ചുറ്റുമാണ് ഈ ചിത്രം വികസിക്കുന്നത്. എന്നാൽ അജയനെ ചുറ്റിപറ്റി നിൽക്കുന്ന ഒരുപാട് മറ്റു കഥാപാത്രങ്ങളും ഈ ചിത്രത്തിൽ ഉണ്ടെന്നും അവർക്കെല്ലാം മികച്ച പ്രാധാന്യം ആണ് ഈ ചിത്രത്തിൽ ഉള്ളത് എന്നും നിമിഷ പറയുന്നു. നെടുമുടി വേണു ചേട്ടനെ പോലെയുള്ള ഒട്ടേറെ അനുഭവ പരിചയമുള്ള ആളുകളോടൊപ്പം അഭിനയിക്കാൻ സാധിച്ചതാണ് ഈ ചിത്രം തന്ന ഏറ്റവും വലിയ ഭാഗ്യം എന്നും, തന്റെ അഭിനയ ജീവിതത്തിലെ ഏറ്റവും വെല്ലുവിളി നിറഞ്ഞ ഒരു കഥാപാത്രം ആണ് ഇതിലെ ഹന്ന എന്നും നിമിഷ പറയുന്നു. അനു സിതാര ആണ് ഈ ചിത്രത്തിലെ മറ്റൊരു നായികാ വേഷം ചെയ്യുന്നത്. ഒരു വക്കീൽ ആയാണ് നിമിഷ ഈ ചിത്രത്തിൽ അഭിനയിക്കുന്നത്. ശരണ്യ പൊൻവണ്ണൻ, അലെൻസിയർ, നെടുമുടി വേണു, സുജിത് ശങ്കർ, സിദ്ദിഖ്, , സുധീർ കരമന, ബാലു വർഗീസ് , ദിലീഷ് പോത്തൻ എന്നിവരും ഈ ചിത്രത്തിന്റെ താര നിരയിൽ ഉണ്ട്