ഓപ്പറേഷൻ ജാവ ഒരുക്കിയ തരുൺ മൂർത്തിയുടെ പുതിയ ചിത്രം പ്രഖ്യാപിച്ചു; ടൈറ്റിൽ പോസ്റ്റർ പുറത്തു..!

തന്റെ ആദ്യ ചിത്രമായ ഓപ്പറേഷൻ ജാവയിലൂടെ വലിയ പ്രേക്ഷക- നിരൂപക പ്രശംസ നേടിയ സംവിധായകൻ ആണ് തരുൺ മൂർത്തി. വലിയ ശ്രദ്ധ നേടിയ ആ ചിത്രത്തിന് ശേഷം ഇപ്പോഴിതാ താനൊരുക്കുന്ന രണ്ടാമത്തെ ചിത്രം പ്രഖ്യാപിച്ചിരിക്കുകയാണ് തരുൺ. തൊണ്ടിമുതലും ദൃക്‌സാക്ഷിയും പോലത്തെ മനോഹര ചിത്രങ്ങൾ നിർമ്മിച്ച സന്ദീപ് സേനൻ ആണ്, ഉർവശി തീയേറ്റേഴ്സ് എന്ന തന്റെ ബാനറിൽ ഈ ചിത്രം നിർമ്മിക്കുന്നത്. സൗദി വെള്ളക്ക എന്ന് പേരിട്ടിരിക്കുന്ന ഈ ചിത്രത്തിന്റെ ടൈറ്റിൽ പോസ്റ്റർ നടൻ കുഞ്ചാക്കോ ബോബൻ പുറത്തു വിട്ടു. തീരപ്രദേശത്തു താമസിക്കുന്ന ഒരു കൂട്ടം സാധാരണക്കാരുടെ ജീവിതത്തിന്റെ നേർക്കാഴ്ച്ചയാണ് ഈ ചിത്രം എന്നാണ് പുറത്തു വരുന്ന വാർത്തകൾ പറയുന്നത്. പുതുമുഖം ദേവി വർമ്മയാണ് ഈ ചിത്രത്തിലെ പ്രധാനകഥാപാത്രത്തെ അവതരിപ്പിക്കുന്നത്. അവർക്കൊപ്പം ലുക്ക്മാൻ, ശ്രിന്ദ, സുധി കോപ്പ, ബിനു പപ്പു എന്നിവരും ഈ ചിത്രത്തിന്റെ താരനിരയിൽ ഉണ്ട്.

സംവിധായകൻ തരുൺ മൂർത്തി തന്നെയാണ് ഈ ചിത്രത്തിന്റെ രചനയും നിർവഹിക്കുന്നതു. റെക്‌സ് വിജയന്റെ പ്രധാന സഹായിയായിരുന്ന പാലി ഫ്രാൻസിസാണ് ഈ ചിത്രത്തിന് വേണ്ടി സംഗീത സംവിധാനം നിർവഹിക്കുന്നതു. ശരൺ വേലായുധൻ ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യാൻ പോകുന്നത് നിഷാദ് യൂസഫാണ്‌. തൊണ്ടിമുതലും ദൃക്‌സാക്ഷിയും, സത്യം പറഞ്ഞാ വിശ്വസിക്കുവോ എന്നീ ചിത്രങ്ങൾക്കു ശേഷം ഉർവ്വശി തീയേറ്റേഴ്‌സിന്റെ ബാനറിൽ പുറത്തു വരാൻ പോകുന്ന ചിത്രമായിരിക്കും ഇത്. കൊച്ചിയിലെ പ്രശസ്ത ചവിട്ടുനാടകക്കാരനായ ഐ ടി ജോസ്, ഗോകുലൻ എന്നിവരും ഒട്ടേറെ പുതുമുഖങ്ങളും ഈ ചിത്രത്തിൽ അഭിനയിക്കുന്നുണ്ട്.