വീണ്ടും സോഷ്യൽ മീഡിയയിൽ തരംഗം സൃഷ്ടിക്കാൻ ഒമർ ലുലു ചിത്രത്തിലെ ഗാനം എത്തുന്നു..!

ഹാപ്പി വെഡിങ്സ്, ചങ്ക്‌സ്, ഒരു അഡാർ ലവ് എന്നീ മൂന്നു ചിത്രങ്ങൾ കൊണ്ട് തന്നെ മലയാള സിനിമയിലെ മുൻനിര സംവിധായകൻ ആയി മാറിയ ആളാണ് ഒമർ ലുലു. അദ്ദേഹത്തിന്റെ ഒരു ചിത്രത്തിൽ പോലും സൂപ്പർ താരങ്ങൾ ഉണ്ടായിരുന്നില്ല എന്ന് മാത്രമല്ല തന്റെ ചിത്രങ്ങൾ കൊണ്ട് അദ്ദേഹം തരംഗം സൃഷ്ടിച്ചത് ഒരു കൂട്ടം പുതുമുഖങ്ങളേയും താരതമ്യേന നവാഗതരായ അഭിനേതാക്കളേയും വെച്ചാണ്. ആദ്യ ചിത്രമായ ഹാപ്പി വെഡിങ് നേടിയ വിജയത്തിന് ശേഷം ക്യാമ്പസ് ലൈഫ് പറഞ്ഞ ചങ്ക്‌സും സ്‌കൂൾ ലൈഫ് കാണിച്ചു തന്ന ഒരു അഡാർ ലവിനും ശേഷം ധമാക്ക എന്ന തന്റെ നാലാമത്തെ ചിത്രവുമായി എത്തുകയാണ് ഒമർ ലുലു. ഈ ചിത്രത്തിലെ ഒരു അടിപൊളി ഗാനം ഉടനെ തന്നെ പ്രേക്ഷകരുടെ മുന്നിലേക്ക് എത്തും.

ഒരു അഡാർ ലവ് എന്ന ചിത്രത്തിലെ “മാണിക്യ മലരായ” എന്ന് തുടങ്ങുന്ന ഗാനം സൃഷ്ടിച്ചത് പോലെ ഒരു തരംഗം സോഷ്യൽ മീഡിയയിൽ ഈ അടുത്ത കാലത്തു മറ്റൊരു ഗാനവും ഉണ്ടാക്കിയിട്ടില്ല. ഇന്ത്യക്കു പുറത്തു വരെ സൂപ്പർ ഹിറ്റായി മാറി ആ ഗാനം. യുവ പ്രേക്ഷകരെ ആവേശം കൊള്ളിക്കുന്ന, രസിപ്പിക്കുന്ന കിടിലൻ പാട്ടുകൾ ആണ് ഒമർ ലുലു ചിത്രത്തിന്റെ ഒരു പ്രത്യേകത. ഇനി വരാൻ പോകുന്ന ധമാക്കയിലെ പാട്ടും പ്രേക്ഷകരെ ഇളക്കി മറിക്കും എന്നുറപ്പാണ്.

ഗോപി സുന്ദർ സംഗീതം ഒരുക്കിയ ഈ ചിത്രത്തിൽ അരുൺ, നിക്കി ഗൽറാണി, മുകേഷ്, ധർമജൻ, സാബുമോൻ അബ്ദുസമദ്, ഉർവശി തുടങി ഒരു വലിയ താര നിര തന്നെ അണിനിരക്കുന്നുണ്ട്. ഒളിമ്പ്യൻ അന്തോണി ആദം എന്ന ചിത്രത്തിലൂടെ കയ്യടി നേടിയ ബാലതാരം ആയ അരുൺ പിന്നീട് ഒട്ടേറെ ചിത്രങ്ങളിൽ അഭിനയിച്ചു എങ്കിലും ആദ്യമായണ് നായക വേഷം ചെയ്യുന്നത്. പതിവ് പോലെ തന്നെ ഒരു കംപ്ലീറ്റ് ഫൺ ഫിലിം ആയാണ് ഒമർ ലുലു ധമാക്കയും ഒരുക്കുന്നത്. തന്റെ മുൻചിത്രങ്ങളിലൂടെ നേടിയ വിജയം ആവർത്തിക്കാനുള്ള ഒരുക്കത്തിലാണ് ഒമർ ലുലു. എം കെ നാസർ ആണ് ഈ ചിത്രം നിർമ്മിക്കുന്നത്.