സൗബിൻ ഷാഹിറിനെതിരെ അസഭ്യ വർഷം; അക്കൗണ്ട് ഹാക്ക് ചെയ്തെന്നു വെളിപ്പെടുത്തി ഒമർ ലുലു

കഴിഞ്ഞ ദിവസങ്ങളിൽ സോഷ്യൽ മീഡിയയിൽ പ്രചരിച്ചത് നടന്‍ സൗബിന്‍ ഷാഹിറിനെ മോശമായി പരാമര്‍ശിച്ച് കൊണ്ട് സംവിധായകന്‍ ഒമര്‍ ലുലു ഫേസ്ബുക്കില്‍ ഇട്ട കുറിപ്പ് എന്ന തരത്തിലുള്ള ഒരു സ്ക്രീൻ ഷോട്ട് ആയിരുന്നു. വലിയ രീതിയിലാണ് ആ സ്ക്രീൻ ഷോട്ട് വൈറലായത്. ഈ കാര്യത്തിൽ ഒമർ ലുലുവിനെ വിമർശിച്ചു കൊണ്ടും അധിക്ഷേപിച്ചു കൊണ്ടും സൗബിൻ ഷാഹിർ ആരാധകർ രംഗത്തു വരികയും ചെയ്തു. ഇപ്പോഴിതാ, അതിന്റെ പിന്നിലെ സത്യാവസ്ഥ വെളിപ്പെടുത്തികൊണ്ട് മുന്നോട്ടു വന്നിരിക്കുകയാണ് ഒമർ ലുലു. ആ പോസ്റ്റ് താനോ തന്റെ അക്കൗണ്ട് നോക്കുന്നവരോ ഇട്ടതല്ലെന്നും, തന്റെ അക്കൗണ്ട് ആരോ ഹാക്ക് ചെയ്തതാണെന്നും ഒമർ ലുലു പറയുന്നു. തന്റെ ഫേസ്ബുക് അക്കൗണ്ടിലിട്ട പോസ്റ്റിലൂടെയാണ് ഈ സംവിധായകൻ കാര്യങ്ങൾ വിശദമാക്കിയത്.

ഒമർ ലുലു കുറിച്ച വാക്കുകൾ ഇങ്ങനെ, “പ്രിയപ്പെട്ടവരെ , എന്റെ പേരിലുള്ള സോഷ്യൽ മീഡിയ പേജിലൂടെ സംവിധായകനും നടനുമായ ശ്രീ സൗബിൻ ഷാഹിറിനെ അപകീർത്തിപ്പെടുത്തുന്ന വിധം പോസ്റ്റ്‌ ചെയ്തതിന്റെ സ്ക്രീൻ ഷോട്ട്സ് പരക്കുന്നത് എന്റെ ശ്രദ്ധയിൽപ്പെടുകയും,പേജുകൾ കൈകാര്യം ചെയ്യുന്ന അഡ്മിൻമാരെ വിളിച്ചപ്പോൾ അവർക്കും ഇതിനെ പറ്റി ഒരു അറിവുമില്ല എന്നാണ് അറിഞ്ഞത്.ഇനി എന്റെ അക്കൗണ്ട് ഏതെങ്കിലും ഹാക്കേർസ് ഹാക്ക് ചെയ്തോ എന്നും എനിക്ക് അറിയില്ല. ശ്രീ സൗബിൻ ഷാഹിറിനും അദ്ദേഹത്തെ സ്നേഹിക്കുന്നവർക്കും വിഷമമുണ്ടായത് അറിഞ്ഞു അതിൽ ഞാനും അങ്ങേയറ്റം ഖേദം രേഖപ്പെടുത്തുന്നു . ഇത് സംബന്ധിച്ചുണ്ടായ വിവാദങ്ങൾ അവസാനിപ്പിക്കണമെന്ന് എല്ലാവരോടും അപേക്ഷിക്കുന്നു .സ്നേഹത്തോടെ ,ഒമർ ലുലു..”. ബാബു ആന്റണി നായകനായ പവർ സ്റ്റാർ, ഒടിടി പ്ലാറ്റ്‍ഫോമിനുവേണ്ടി ആദ്യമായി ഒരുക്കുന്ന നല്ല സമയം എന്നീ ചിത്രങ്ങളാണ് ഇനി ഒമർ ലുലുവിന്റെതായി പുറത്തു വരാനുള്ളത്.