ഫാൻസ് തള്ളി മറിക്കുന്നത് കണ്ടിട്ട് തിയറ്ററില്‍ പോയി കണ്ട് ലാഗ് അടിച്ച് ചത്ത ഒരു സിനിമയേക്കാൾ എത്രയോ നല്ല എന്‍റര്‍ടെയ്നര്‍; മോൺസ്റ്ററിന് പ്രശംസയുമായി ഒമർ ലുലു

മലയാളത്തിന്റെ മഹാനടൻ മോഹൻലാൽ നായകനായി എത്തിയ ഏറ്റവും പുതിയ ചിത്രമാണ് മോൺസ്റ്റർ. ഉദയ കൃഷ്ണ രചിച്ച് വൈശാഖ് സംവിധാനം ചെയ്ത ഈ ചിത്രം ഒരു ഇൻവെസ്റ്റിഗേഷൻ ത്രില്ലർ ആയി ഒരുക്കിയ ചിത്രമാണ്. അതിനൊപ്പം തന്നെ വളരെ വ്യത്യസ്തമായ, മലയാളത്തിൽ അധികം ചർച്ച ചെയ്യാത്ത ഒരു പ്രമേയവും ഈ ചിത്രം ചർച്ച ചെയ്യുന്നുണ്ട്. അത്കൊണ്ട് തന്നെ മികച്ച പ്രതികരണമാണ് പ്രേക്ഷകരുടെ ഇടയിൽ നിന്നും ഈ ചിത്രത്തിന് ലഭിച്ചു കൊണ്ടിരിക്കുന്നത്. മികച്ച രീതിയിൽ മുന്നേറുന്ന ഈ ചിത്രത്തിന് പ്രശംസയുമായി എത്തിയിരിക്കുകയാണ് പ്രശസ്ത സംവിധായകൻ ഒമർ ലുലു. തന്റെ ഫേസ്ബുക് പേജിലൂടെയാണ് അദ്ദേഹം ചിത്രം കണ്ടതിനു ശേഷമുള്ള അഭിപ്രായം പങ്ക് വെച്ചത്.

ഒമർ ലുലു തന്റെ ഫേസ്ബുക് പേജിൽ കുറിച്ച വാക്കുകൾ ഇങ്ങനെ,“ഇപ്പോ അടുത്ത് ഫേസ്ബുക്കില്‍ ഫാൻസ് തള്ളി മറിക്കുന്നത് കണ്ടിട്ട് ഞാന്‍ തിയറ്ററില്‍ പോയി കണ്ട് ലാഗ് അടിച്ച് ചത്ത ഒരു സിനിമയേക്കാൾ എത്രയോ നല്ല എന്‍റര്‍ടെയ്നര്‍ ആണ് ലാലേട്ടന്‍റെ മോൺസ്റ്റർ. ഹണി റോസും അടിപൊളി ആയിട്ടുണ്ട്”. മോഹൻലാൽ, ഹണി റോസ്, ലക്ഷ്മി മൻചു എന്നിവരുടെ പ്രകടനമാണ് ഈ ചിത്രത്തിന്റെ ഹൈലൈറ്റ്. ട്വിസ്റ്റുകളും സർപ്രൈസ് എലമെന്റുകളുമായി പ്രേക്ഷകരെ ആകാംഷയുടെ മുൾമുനയിൽ നിർത്തുന്ന രണ്ടാം പകുതിയാണ് ഈ ചിത്രത്തിന് വലിയ കയ്യടി നേടിക്കൊടുക്കുന്നത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രത്തിൽ ജോണി ആന്റണി, കോട്ടയം രമേശ്, സുദേവ് നായർ, ഗണേഷ് കുമാർ, സിദ്ദിഖ്, ലെന, ഇടവേള ബാബു എന്നിവരും അഭിനയിച്ചിട്ടുണ്ട്.