യു എ സർട്ടിഫിക്കറ്റുമായി മോഹൻലാൽ- വൈശാഖ് ചിത്രം; പുലിമുരുകൻ ടീമിന്റെ മോൺസ്റ്റർ റിലീസ് തീയതി പ്രഖ്യാപിച്ചു

ഇപ്പോൾ മലയാള സിനിമയിലെ ഇൻഡസ്ട്രി ഹിറ്റായി നിൽക്കുന്ന ചിത്രമാണ് മോഹൻലാൽ നായകനായ പുലി മുരുകൻ. 2016 ഇൽ ഈ ചിത്രം സ്ഥാപിച്ച കളക്ഷൻ റെക്കോർഡ് ആറ് വർഷങ്ങൾക്കിപ്പുറവും നിലനിൽക്കുകയാണ്. മലയാള സിനിമയുടെ ചരിത്രത്തിൽ തന്നെ ഏറ്റവും കൂടുതൽ ദിവസം ഇൻഡസ്ട്രി ഹിറ്റായി തുടർന്ന ചിത്രം കൂടിയാണ് പുലിമുരുകൻ. ഉദയകൃഷ്ണ രചിച്ച് വൈശാഖ് സംവിധാനം ചെയ്ത ഈ ചിത്രം മലയാളത്തിലെ ആദ്യത്തെ നൂറ് കോടി കളക്ഷൻ നേടിയ ചിത്രവുമാണ്. ഇപ്പോഴിതാ ആറ് വർഷങ്ങൾക്കു ശേഷം മോഹൻലാൽ- വൈശാഖ്- ഉദയകൃഷ്ണ ടീം ഒന്നിച്ച മറ്റൊരു ചിത്രം കൂടി പ്രേക്ഷകരുടെ മുന്നിലെത്തുകയാണ്. മോൺസ്റ്റർ എന്ന് പേരിട്ടിരിക്കുന്ന ഈ ചിത്രത്തിന്റെ സെൻസറിങ് ഇന്നലെ പൂർത്തിയായി, യു എ സർട്ടിഫിക്കറ്റ് ലഭിച്ചിരിക്കുന്ന ഈ ചിത്രം ഒക്ടോബർ ഇരുപത്തിയൊന്നിന് ആഗോള റിലീസായി എത്തുമെന്നും ഒഫീഷ്യലായി പ്രഖ്യാപിച്ചു.

ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ചിരിക്കുന്ന ഈ ചിത്രം ഒരു ത്രില്ലറാണെന്ന സൂചനയാണ് ഇതിന്റെ ട്രൈലെർ നൽകുന്നത്. ലക്കി സിങ് എന്ന കഥാപാത്രമായി മോഹൻലാൽ എത്തുന്ന ഈ ചിത്രത്തിൽ ജോണി ആന്റണി, കോട്ടയം രമേശ്, സുദേവ് നായർ, ഹണി റോസ്, ഗണേഷ് കുമാർ, സിദ്ദിഖ്, ലക്ഷ്മി മഞ്ചു, ലെന, ഇടവേള ബാബു തുടങ്ങി ഒരുപിടി പ്രശസ്ത താരങ്ങൾ അഭിനയിച്ചിട്ടുണ്ട്. സതീഷ് കുറുപ്പ് ക്യാമറ ചലിപ്പിച്ചിരിക്കുന്ന ഈ ചിത്രത്തിന് എഡിറ്റിംഗ് നിർവഹിച്ചിരിക്കുന്നത് ഷമീർ മുഹമ്മദാണ്. ദീപക് ദേവാണ് ഈ ചിത്രത്തിന്റെ സംഗീത സംവിധായകൻ. മലയാളത്തിൽ അധികം ചർച്ച ചെയ്യാത്ത ചില കാര്യങ്ങൾ പറയുന്ന ചിത്രമാകുമിതെന്നാണ് സംവിധായകൻ വൈശാഖ് പറയുന്നത്.