ഒടിയനെ കുറിച്ച് മനസ്സ് തുറന്നു തിരക്കഥാകൃത്തു; മാസ്സും ക്ലാസും നിറഞ്ഞ ഒരു സിനിമാനുഭവം ആയിരിക്കും ഒടിയൻ..!

ഇപ്പോൾ കേരളമെങ്ങും ചർച്ച ഒടിയൻ എന്ന മോഹൻലാൽ ചിത്രമാണ്. വരുന്ന ഡിസംബർ പതിനാലിന് റിലീസ് ചെയ്യാൻ പോകുന്ന ഈ ചിത്രം അത്രയധികം ആവേശത്തോടും ആകാംഷയോടും ആണ് പ്രേക്ഷകർ കാത്തിരിക്കുന്നത്. റിലീസിന് മുൻപേ തന്നെ മലയാള സിനിമയിലെ പല റെക്കോർഡുകളും തകർത്തെറിഞ്ഞ ഈ ചിത്രത്തെ കുറിച്ച്, ഇതിന്റെ രചയിതാവായ ഹരികൃഷ്ണൻ ഇപ്പോൾ മനസ്സ് തുറക്കുകയാണ്. മാസ്സും ക്ലാസും നിറഞ്ഞ ഒരു സിനിമാനുഭവം ആയിരിക്കും ഒടിയൻ എന്നാണ് അദ്ദേഹം പറയുന്നത്. മോഹൻലാൽ , മഞ്ജു വാര്യർ, പ്രകാശ് രാജ് എന്നിവരുടെ കരിയറിലെ തന്നെ ഏറ്റവും മികച്ച അഭിനയ പ്രകടനങ്ങളിലൊന്ന് നമ്മുക്ക് മുന്നിൽ എത്തിക്കുന്ന ഒരു ചിത്രമായിരിക്കും ഒടിയൻ എന്ന് അദ്ദേഹം പറയുന്നു.

എന്നാൽ അതിനൊപ്പം തന്നെ ആരാധകരെ ആവേശം കൊള്ളിക്കുന്ന പഞ്ച് ഡയലോഗുകളും കിടിലൻ ആക്ഷനും ഈ ചിത്രത്തിന്റെ ഭാഗമാണ് താനും. മോഹൻലാലിനെ പ്രേക്ഷകർ എങ്ങനെയൊക്കെ കാണാൻ ആഗ്രഹിക്കുന്നോ അതുപോലെ തന്നെ ഈ ചിത്രത്തിൽ അവതരിപ്പിച്ചിട്ടുണ്ട് എന്നാണ് അദ്ദേഹം പറയുന്നത്. വളരെ ആഴമുള്ള ഒരു കഥ പറയുന്ന ഈ ചിത്രത്തിൽ മലയാള സിനിമയിൽ ഇന്നേ വരെ വന്നിട്ടുള്ളതിൽ വെച്ച് ഏറ്റവും മികച്ച വി എഫ് എക്സ് ആണുള്ളത് എന്നും അദ്ദേഹം പറയുന്നു. എം ജയചന്ദ്രൻ ഒരുക്കിയ മനോഹരമായ ഗാനങ്ങളും പീറ്റർ ഹെയ്‌ൻ ഒരുക്കിയ സംഘട്ടന രംഗങ്ങളും ഉള്ള ഈ ചിത്രം ശ്രീകുമാർ മേനോൻ എന്ന പ്രതിഭാധനൻ ആയ സംവിധായകനെ കൂടി നമ്മുക്ക് സമ്മാനിക്കും എന്നും ഹരികൃഷ്ണൻ പറയുന്നു. പ്രേക്ഷകരെ കാത്തു ചിത്രത്തിൽ ഒരുപാട് സർപ്രൈസുകൾ ഉണ്ടെന്നും അദ്ദേഹം സൂചന നൽകുന്നു.