ഒടിയൻ ഒരു ഗംഭീര സിനിമയാവും എന്ന് പീറ്റർ ഹെയ്‌ൻ; ഷൂട്ടിംഗ് അവസാനിച്ചു..!

മലയാളത്തിന്റെ താര ചക്രവർത്തി മോഹൻലാൽ നായകനായ ഒടിയൻ എന്ന ചിത്രത്തിന്റെ ഷൂട്ടിംഗ് അവസാനിച്ചു. ഇപ്പോൾ പോസ്റ്റ്-പ്രൊഡക്ഷൻ സ്റ്റേജിൽ ഉള്ള ഈ ചിത്രത്തിന്റെ മൂന്ന് ദിവസത്തെ അവസാന ഘട്ട ഷൂട്ടിംഗ് ആണ് ഇന്ന് വെളുപ്പിന് മൂന്നു മണിക്ക് പൂർത്തിയായത്. ഒന്നര വർഷത്തോളം സമയമെടുത്താണ് ഈ ചിത്രത്തിന്റെ ഷൂട്ടിംഗ് പൂർത്തിയാക്കിയത്. ചിത്രത്തിന്റെ ഷൂട്ടിംഗ് അവസാനിച്ചു എന്നും ഒരുപാട് പരിശ്രമം എടുത്ത സിനിമയാണ് ഒടിയൻ എന്നും സംഘട്ടന സംവിധായകൻ പീറ്റർ ഹെയ്‌ൻ പറയുന്നു. ഈ ചിത്രം തനിക്കു എപ്പോഴും സ്പെഷ്യൽ ആണെന്നും ഇതൊരു ഗംഭീര സിനിമ ആയിരിക്കുമെന്നും അദ്ദേഹം കൂട്ടി ചേർത്തു.

ഈ ചിത്രത്തിൽ ജോലി ചെയ്ത ഓരോരുത്തരും അത്രമാത്രം പരിശ്രമം ഇതിനു വേണ്ടി എടുത്തിട്ടുണ്ടെന്നും അതിന്റെ ഫലം തീർച്ചയായും ലഭിക്കും എന്നും അദ്ദേഹം പറഞ്ഞു. തന്നെ പിന്തുണച്ച ഈ ചിത്രത്തിലെ മുഴുവൻ ആളുകൾക്കും അദ്ദേഹം നന്ദി പറയുകയും ചെയ്തു. ഇനി പോസ്റ്റ് പ്രൊഡക്ഷന്റെ അവസാന ഘട്ടത്തിലേക്ക് കടക്കുന്ന ഈ ചിത്രം വരുന്ന ഡിസംബർ മാസത്തിൽ മലയാള സിനിമയിലെ എക്കാലത്തെയും വലിയ റിലീസ് ആയി കേരളത്തിലെ തീയേറ്ററുകളിൽ എത്തും. വി എ ശ്രീകുമാർ മേനോൻ സംവിധാനം ചെയ്ത ഒടിയൻ മലയാളത്തിലെ ഏറ്റവും മുതൽ മുടക്കുള്ള ചിത്രങ്ങളിൽ ഒന്നാണ്. ആന്റണി പെരുമ്പാവൂർ നിർമ്മിച്ച ഈ ചിത്രത്തിൽ മഞ്ജു വാര്യർ, പ്രകാശ് രാജ് എന്നിവരും മുഖ്യ വേഷങ്ങൾ ചെയ്തിട്ടുണ്ട്. സിദ്ദിഖ്, ഇന്നസെന്റ്, മനോജ് ജോഷി, നന്ദു, കൈലാഷ്, അനീഷ് ജി മേനോൻ, ശ്രീജയ, സന അൽത്താഫ്, നരെയ്ൻ തുടങ്ങി ഒരു വലിയ താര നിര തന്നെ ഈ ചിത്രത്തിൽ അണിനിരക്കുന്നുണ്ട്. എം ജയചന്ദ്രൻ ഗാനങ്ങൾ ഒരുക്കിയ ഈ ചിത്രത്തിന് പശ്ചാത്തല സംഗീതം ഒരുക്കിയത് സാം സി എസും ദൃശ്യങ്ങൾ ഒരുക്കിയത് ഷാജികുമാറും ആണ്.

ഫോട്ടോ കടപ്പാട്: മനു