മാസ്സ് ആക്ഷനും, പാട്ടുകളും, ഡാൻസും, ഇമോഷനും ചേർന്ന ഒരു കംപ്ലീറ്റ് എന്റെർറ്റൈനെർ ആയിരിക്കും പൊറിഞ്ചു മറിയം ജോസ്: നൈല ഉഷ

മാസ്റ്റർ ഡയറക്ടർ ജോഷി സംവിധാനം ചെയ്ത പൊറിഞ്ചു മറിയം ജോസ് എന്ന ചിത്രത്തിന്റെ ട്രൈലെർ ലോഞ്ച് ഇന്നലെ കൊച്ചി ലുലു മാളിൽ വെച്ച് നടന്നു. കംപ്ലീറ്റ് ആക്ടർ മോഹൻലാൽ ആണ് ഈ ചിത്രത്തിന്റെ ട്രൈലെർ അവിടെ വെച്ച് ലോഞ്ച് ചെയ്തത്. ജോജു ജോർജ്, ചെമ്പൻ വിനോദ്, നൈല ഉഷ എന്നിവർ പ്രധാന വേഷങ്ങളിൽ എത്തുന്ന ഈ ചിത്രം നിർമ്മിച്ചത് കീർത്തന മൂവീസ്, ഡേവിഡ് കാച്ചപ്പിള്ളി പ്രൊഡക്ഷൻസ്, അപ്പു പാത്തു പപ്പു പ്രൊഡക്ഷൻസ് എന്നിവ ചേർന്നാണ്. ഒരു ചെറിയ ഇടവേളയ്ക്കു ശേഷം ജോഷി തിരിച്ചെത്തുന്ന ഈ ചിത്രത്തിൽ പ്രേക്ഷകർ ഒരു ജോഷി ചിത്രത്തിൽ നിന്ന് പ്രതീക്ഷിക്കുന്ന എല്ലാം ഉണ്ടാകും എന്ന് പറയുകയാണ് ചിത്രത്തിലെ നായികാ വേഷം ചെയ്ത നൈല ഉഷ. ആക്ഷനും മാസ്സും പാട്ടുകളും ഡാൻസും ഡ്രാമയും ഇമോഷനും എല്ലാം ചേർന്ന ഒരു കംപ്ലീറ്റ് എന്റെർറ്റൈനെർ ആയിരിക്കും പൊറിഞ്ചു മറിയം ജോസ് എന്നും നൈല ഉഷ പറയുന്നു.

ഇന്റർനാഷണൽ ഫിലിം ഫെസ്റ്റിവലിൽ വരെ മികച്ച നടൻ ആയി തിരഞ്ഞെടുക്കപ്പെട്ട ചെമ്പൻ വിനോദിനെ ജോസ് എന്ന കഥാപാത്രമായും ഇപ്പോൾ സംസ്ഥാന അവാർഡ് വരെ നേടിയ ജോജുവിനെ പൊറിഞ്ചു ആയും തിരഞ്ഞെടുത്തതിൽ അത്ഭുതം ഇല്ലെങ്കിലും മറിയം ആയി അഭിനയിക്കാൻ തന്നെ ക്ഷണിച്ചത് എന്ത് കൊണ്ടാണ് എന്ന് അത്ഭുതപ്പെട്ടു എന്ന് നൈല പറയുന്നു. തന്റെ കഴിവിന്റെ പരമാവധി ആ കഥാപാത്രത്തെ ഏറ്റവും മികച്ചതാക്കാൻ ശ്രമിച്ചിട്ടുണ്ട് എന്നും നൈല പറഞ്ഞു. ഓഗസ്റ്റ് പതിനഞ്ചിനു ആണ് ഈ ചിത്രം തീയേറ്ററിൽ എത്തുക. നവാഗതനായ അഭിലാഷ് എൻ ചന്ദ്രൻ ആണ് പൊറിഞ്ചു മറിയം ജോസ് രചിച്ചിരിക്കുന്നത്.