ഹൗസ്‌ഫുൾ ഷോകളുമായി സാറ്റർഡേ നൈറ്റ്; വിജയമാവർത്തിച്ച് നിവിൻ പോളി

യുവ താരം നിവിൻ പോളി നായകനായി റിലീസ് ചെയ്ത ഏറ്റവും പുതിയ ചിത്രമാണ് സാറ്റർഡേ നൈറ്റ്. കായംകുളം കൊച്ചുണ്ണി എന്ന ബ്ലോക്ക്ബസ്റ്റർ ചിത്രത്തിന് ശേഷം നിവിൻ പോളി- റോഷൻ ആൻഡ്രൂസ് ടീം ഒന്നിച്ച ഈ ചിത്രം വളരെ രസകരമായി കഥ പറയുന്ന ഒരു ഫൺ ഫിലിമാണ്. മികച്ച പ്രേക്ഷക പ്രശംസ നേടുന്ന സാറ്റർഡേ നൈറ്റ് കേരളത്തിൽ ഹൗസ്ഫുൾ ഷോകളുമായാണ് മുന്നേറുന്നത്. ആദ്യാവസാനം പ്രേക്ഷകർക്ക് ചിരി സമ്മാനിക്കുന്ന ഈ ചിത്രം സൗഹൃദത്തിന്റെ സന്തോഷവും ആവേശവും സ്വാതന്ത്ര്യവുമൊക്കെ ആഘോഷിക്കുന്ന ചിത്രമാണ്. എ ബി സി ഡി, അനുരാഗ കരിക്കിൻ വെള്ളം എന്നീ ഹിറ്റ് ചിത്രങ്ങൾ രചിച്ച നവീൻ ഭാസ്കർ തിരക്കഥ രചിച്ച ഈ ബിഗ് ബഡ്ജറ്റ് ചിത്രം, വിനായക ഫിലിംസിന്റെ ബാനറിൽ അജിത് വിനായകയാണ് നിർമ്മിച്ചിരിക്കുന്നത്. അജു വർഗീസ്, സിജു വിൽസൺ, സൈജു കുറുപ്പ്, ഗ്രേസ് ആന്റണി, മാളവിക ശ്രീനാഥ് , സാനിയ ഇയ്യപ്പൻ, ശാരി എന്നിവരാണ് ഇതിലെ മറ്റ് പ്രധാന വേഷങ്ങൾ ചെയ്തിരിക്കുന്നത്.

നിവിൻ പോളി അവതരിപ്പിക്കുന്ന സ്റ്റാൻലി എന്ന കഥാപാത്രത്തിനും ആ കഥാപാത്രത്തിന്റെ സൗഹൃദസംഘത്തിനും ചുറ്റും വികസിക്കുന്ന ഈ ചിത്രത്തിൽ പൂച്ച സുനിലായി അജു വർഗീസ് എത്തുമ്പോൾ ജസ്റ്റിൻ ആയി സൈജു കുറുപ്പും അജിത് ആയി സിജു വിത്സനും എത്തുന്നു. വിജയ് മേനോൻ, അശ്വിൻ മാത്യു, പ്രതാപ് പോത്തൻ എന്നിവരും ഇതിൽ വേഷമിട്ടിട്ടുണ്ട്. യുവ പ്രേക്ഷകരെയാണ് സാറ്റർഡേ നൈറ്റ് കൂടുതലായി ആകർഷിക്കുന്നത്. പടവെട്ട് എന്ന ചിത്രത്തിന് ശേഷം വീണ്ടുമൊരു നിവിൻ പോളി ചിത്രം മികച്ച പ്രേക്ഷകാഭിപ്രായം നേടുന്ന കാഴ്ചയാണ് കാണാൻ സാധിക്കുന്നത്. ടി ശിവാനന്ദേശ്വരൻ എഡിറ്റ് ചെയ്ത ഈ ചിത്രത്തിന് ക്യാമറ ചലിപ്പിച്ചത് അസ്‌ലം കെ പുരയിൽ, ഇതിനു സംഗീതമൊരുക്കിയത് ജേക്സ് ബിജോയ് എന്നിവരാണ്.