ദുൽഖറും താനും അടുത്ത സുഹൃത്തുക്കളാണെന്നും കുട്ടികളുടെ ചിത്രങ്ങൾ ഷെയർ ചെയ്യാറുണ്ടെന്നും നിവിൻ പോളി

മലയാളത്തിലെ യുവതാരനിരയിൽ ശ്രദ്ധേയരായ രണ്ട് പേരാണ് നിവിൻ പോളിയും ദുൽഖർ സൽമാനും. രണ്ടുപേരും അടുത്ത സുഹൃത്തുക്കളുമാണ്. എന്നാൽ സോഷ്യൽ മീഡിയയിൽ ഇരുവരുടെയും ആരാധകർ തമ്മിൽ വാദപ്രതിവാദങ്ങൾ ഉണ്ടാകാറുണ്ട്. അടുത്തിടെ നടന്ന ഒരു അഭിമുഖത്തിൽ നിവിൻ പോളിയോട് ഇക്കാര്യത്തെക്കുറിച്ച് ചോദ്യമുയർന്നിരുന്നു.

ഇതിന് മറുപടിയായി ദുൽഖറും താനും അടുത്ത സുഹൃത്തുക്കളാണെന്നും തങ്ങൾ എപ്പോഴും ഫോണിലൂടെ സംസാരിക്കാറുണ്ടെന്നും നിവിൻ പറയുകയുണ്ടായി. തങ്ങളുടെ ഭാര്യമാരും സുഹൃത്തുക്കളാണ്. കൂടാതെ കുട്ടികളുടെ ചിത്രങ്ങൾ അങ്ങോട്ടും ഇങ്ങോട്ടും ഷെയർ ചെയ്യാറുമുണ്ട്. ആരാധകർ തമ്മിലുള്ള മത്സരം എല്ലായിടത്തും ഉള്ളതാണ്. ആരോഗ്യകരമായ മത്സരം സ്വാഭാവികമായും സിനിമാ ഇന്റസ്ട്രിയെ സഹായിക്കുമെന്നും നിവിൻ കൂട്ടിച്ചേർത്തു.

മലയാളത്തിന് പുറമെ അന്യഭാഷാചിത്രങ്ങളിലും നിവിൻ പോളിയും ദുൽഖർ സൽമാനും ഇപ്പോൾ ചുവടുറപ്പിച്ചിരിക്കുകയാണ്. നിവിന്റെ ആദ്യതമിഴ് ചിത്രമായ റിച്ചി റിലീസിനൊരുങ്ങിക്കഴിഞ്ഞു. അതേസമയം തെലുങ്കിലും ഹിന്ദിയിലുമാണ് ദുൽഖർ അരങ്ങേറ്റം നടത്തിയിരിക്കുന്നത്. തെലുങ്കിൽ ‘മഹാനടി’ എന്ന ചിത്രത്തിലാണ് ദുൽഖർ അഭിനയിക്കുന്നത്. ജെമിനി ഗണേശന്റെ വേഷത്തിലാണ് താരം എത്തുന്നത്. ‘കർവാൻ’ ആണ് ദുൽഖറിന്റെ ആദ്യ ഹിന്ദി ചിത്രം. അഭിനേതാവും തിരക്കഥാകൃത്തുമായ ആകര്‍ഷ് ഖുറാനയാണ് ചിത്രത്തിന്റെ സംവിധാനം നിർവഹിക്കുന്നത്. ദുല്‍ഖറിനൊപ്പം പ്രമുഖ ബോളിവുഡ് താരം ഇര്‍ഫാന്‍ ഖാനും മറ്റൊരു പ്രധാന കഥാപാത്രത്തെ അവതരിപ്പിക്കുന്നുണ്ട്. അതേസമയം ബോളിവുഡിലെ അരങ്ങേറ്റ ചിത്രം റിലീസ് ചെയ്യുന്നതിന് മുമ്പ് തന്നെ അനുരാഗ് കശ്യാപിന്റെ അടുത്ത സിനിമയിലും ദുല്‍ഖര്‍ പ്രധാന കഥാപാത്രത്തെ അവതരിപ്പിക്കുന്നതായി റിപ്പോര്‍ട്ടുകള്‍ വന്നിട്ടുണ്ട്.