നടന വിസ്മയവും നടിപ്പിൻ നായകനും; സോഷ്യൽ മീഡിയയിൽ തീ പോലെ പടർന്നു കാപ്പാൻ സ്റ്റിൽ..!

കംപ്ലീറ്റ് ആക്ടർ മോഹൻലാലും തമിഴ് സിനിമയുടെ നടിപ്പിൻ നായകനായ സൂര്യയും ആദ്യമായി ഒന്നിച്ചു അഭിനയിക്കുന്ന ചിത്രമാണ് കാപ്പാൻ. പ്രശസ്ത സംവിധായകൻ കെ വി ആനന്ദ് സംവിധാനം ചെയ്ത ഈ ചിത്രത്തിന്റെ ടീസറും പോസ്റ്ററുകളും പുറത്തു വന്ന ഒരു ലിറിക് സോങ് വിഡിയോയും വമ്പൻ ഹിറ്റായി മാറിയിരുന്നു. ഈ വർഷം ഓഗസ്റ്റ് മാസത്തിൽ റിലീസിന് എത്തുന്ന ഈ വമ്പൻ ചിത്രം നിർമ്മിച്ചിരിക്കുന്നത് ലൈക്ക പ്രൊഡക്ഷൻസ് ആണ്. മോഹൻലാൽ, സൂര്യ എന്നിവർക്ക് ഒപ്പം ആര്യ, ബൊമൻ ഇറാനി തുടങ്ങി പ്രശസ്ത താരങ്ങളും ഈ ചിത്രത്തിൽ അഭിനയിക്കുന്നുണ്ട്. ഇപ്പോഴിതാ ഇന്ന് പുറത്തു വന്ന ഈ ചിത്രത്തിലെ ഒരു സ്റ്റിൽ സോഷ്യൽ മീഡിയയിൽ കാട്ടുതീ പോലെ പടരുകയാണ്.

മോഹൻലാലും സൂര്യയും ഒന്നിച്ചുള്ള ഈ ചിത്രം ആരാധകരും സിനിമാ പ്രേമികളും ഒരേ ആവേശത്തോടെയാണ് ഏറ്റെടുക്കുന്നത്. ഇന്ത്യൻ പ്രധാന മന്ത്രി ആയി മോഹൻലാൽ അഭിനയിക്കുന്ന ഈ ചിത്രത്തിൽ അദ്ദേഹത്തിന്റെ അംഗ രക്ഷകൻ ആയാണ് സൂര്യ എത്തുന്നത്. സായ്‌യേഷ നായികാ വേഷത്തിൽ എത്തുന്ന ഈ ചിത്രത്തിന് സംഗീതം പകർന്നിരിക്കുന്നത് ഹാരിസ് ജയരാജ് ആണ്. മോഹൻലാൽ ഈ ചിത്രത്തിൽ ഒരു ദൈർഖ്യമേറിയ അതിഥി വേഷമാണ് ചെയ്യുന്നത് എന്നും റിപ്പോർട്ടുകൾ ഉണ്ട്. ഏതായാലും മോഹൻലാൽ- സൂര്യ ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് കാപ്പാൻ. തമിഴ് നാട്ടിലും നോർത്ത് ഇന്ത്യയിലും വിദേശത്തും ചിത്രീകരിച്ച ഈ ആക്ഷൻ ചിത്രം കെ വി ആനന്ദ്- സൂര്യ ടീം ഒന്നിച്ച മൂന്നാമത്തെ ചിത്രമാണ്.