അഭിമുഖത്തിനിടെ പൊട്ടിക്കരഞ്ഞു നടി; ദിവസങ്ങളോളം പട്ടിണി എന്ന് താരം..!

മലയാള സിനിമാ പ്രേക്ഷകർക്ക് ഏറെ പരിചിതമായ മുഖമാണ് നടി നേഹാ സക്സേനയുടേത്. മെഗാ സ്റ്റാർ മമ്മൂട്ടിയുടെ നായികാ വേഷം ചെയ്തു കൊണ്ട് കസബ എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച ഈ നടി അതിനു ശേഷം കംപ്ലീറ്റ് ആക്ടർ മോഹൻലാൽ നായകനായ മുന്തിരി വള്ളികൾ തളിർക്കുമ്പോൾ എന്ന ബ്ലോക്ക്ബസ്റ്റർ ചിത്രത്തിലും ശ്രദ്ധ നേടുന്ന കഥാപാത്രത്തെ അവതരിപ്പിച്ചു. അതിനു ശേഷം സൗത്ത് ഇന്ത്യൻ ഭാഷകളിൽ നിറഞ്ഞു നിന്ന ഈ താരം ഇപ്പോൾ അഭിനയിച്ചു റിലീസ് ചെയ്യാൻ ഇരിക്കുന്ന മലയാള ചിത്രം പ്രശസ്ത സംവിധായകൻ ഒമർ ലുലുവിന്റെ നാലാമത്തെ ചിത്രമായ ധമാക്ക ആണ്. ഇപ്പോഴിതാ ഒരു അഭിമുഖത്തിൽ പൊട്ടി കരയുന്ന ഈ താരത്തിന്റെ വീഡിയോ സോഷ്യൽ മീഡിയയിൽ വൈറൽ ആവുകയാണ്.

ഇന്ത്യൻ സിനിമാ ഗാലറി എന്ന യൂട്യൂബ് ചാനലിന് നൽകിയ അഭിമുഖത്തിനിടെ ആണ് നേഹ സക്‌സേന പൊട്ടിക്കരഞ്ഞത്. ഇന്ന് ഇവിടെയെത്തി നിൽക്കുമ്പോൾ തന്റെ കുട്ടികാലത്തെ കാര്യങ്ങൾ പങ്കു വെക്കവേ ആണ് നടി വികാരഭരിതയായതു. ദാരിദ്ര്യം മൂലം ബാല്യത്തില്‍ ഭക്ഷണം വാങ്ങാന്‍ പണം ഇല്ലാതിരുന്നു എന്ന് പറഞ്ഞ നേഹ, ഒന്‍പതു ദിവസങ്ങള്‍ അമ്മയും താനും പച്ചവെള്ളം മാത്രം കുടിച്ചു കഴിഞ്ഞതും ഓർത്തെടുക്കുന്നു. അച്ഛൻ കുട്ടിക്കാലത്തു തന്നെ തങ്ങളെ വിട്ടു പോയി എന്നും താനും അമ്മയും ഏറെ കഷ്ടപ്പെട്ടാണ് ജീവിച്ചത് എന്നും നേഹ വെളിപ്പെടുത്തി.

താൻ സിനിമയിൽ അഭിനയിക്കുന്നതിനോട് അമ്മക്ക് താല്പര്യം ഇല്ലായിരുന്നു എങ്കിലും അമ്മക്ക് എല്ലാം നേടികൊടുക്കണം എന്ന ചിന്തയാണ് തന്നെ മോഡലിങ്ങിലേക്കും പിന്നീട് സിനിമയിലേക്കും എത്തിച്ചത് എന്നാണ് നേഹ പറയുന്നത്. അമ്മ അറിയാതെ ആണ് താൻ ആദ്യം മോഡലിംഗ് ചെയ്തത് എന്നും നേഹ പറഞ്ഞു. പിന്നിട്ട കാലങ്ങളിൽ അനുഭവിക്കേണ്ട വന്ന വേദനകൾ ആണ് ഇന്ന് തന്നെ ഇപ്പോഴത്തെ സ്ഥിതിയിൽ എത്തിച്ചത് എന്നും വിജയത്തിന് വേണ്ടി ഇന്നുവരെ ഒരാളുടെയും കാലു പിടിച്ചിട്ടില്ല എന്നും ഈ നടി പറയുന്നു. കുറുക്കു വഴികൾക്കു പിന്നാലെ പോകാതെ കഠിനമായി പരിശ്രമിച്ചിട്ടു തന്നെയാണ് താൻ ഇന്നത്തെ നേഹ സക്‌സേന ആയതു എന്നും ഈ താരം വെളിപ്പെടുത്തുന്നു.