റെക്കോഡുകൾ തകർത്ത് 300 കോടി ക്ലബിൽ ഇടം നേടി ദളപതിയുടെ ബിഗിൽ..!!

തമിഴ് സിനിമയുടെ ചരിത്രത്തിലെ തന്നെ ഏറ്റവും വലിയ രണ്ടാമത്തെ വിജയം ആയി മാറിയിരിക്കുകയാണ് ദളപതി വിജയ് നായകനായ ബിഗിൽ. ആറ്റ്ലി സംവിധാനം ചെയ്ത ഈ ചിത്രം പതിനേഴു ദിവസം കൊണ്ട് ആഗോള കളക്ഷൻ ആയി നേടിയിരിക്കുന്നത് 300 കോടി രൂപയാണ് എന്നാണ് ഏറ്റവും പുതിയ കളക്ഷൻ റിപ്പോർട്ടുകൾ പറയുന്നത്. രജനികാന്ത് ചിത്രം എന്തിരൻ 2 മാത്രമാണ് ബിഗിലിന് മുന്നിൽ ഉള്ളത്. ഡൊമസ്റ്റിക് മാർക്കറ്റിൽ നിന്ന് മാത്രം ഇരുനൂറു കോടി കളക്ഷൻ എന്ന നേട്ടത്തിലേക്ക് കുതിക്കുകയാണ് ബിഗിൽ ഇപ്പോൾ. ആന്ധ്രയിൽ നിന്ന് 20 കോടി രൂപ ഗ്രോസ് നേടിയ ബിഗിൽ കേരളത്തിലേയും ഏറ്റവും കൂടുതൽ ഗ്രോസ് നേടിയ തമിഴ് ചിത്രം ആവാനുള്ള ഒരുക്കത്തിലാണ്.

ചിത്രത്തിന്റെ തമിഴ് വേർഷൻ മാത്രം 266 കോടി ഗ്രോസ് നേടിയതോടെ, ബാഹുബലി 2 തമിഴ് വേർഷൻ മാത്രം നേടിയ 259 കോടി എന്ന റെക്കോർഡും ബിഗിൽ പിന്നിട്ടു. ബാഹുബലി സീരിസ്, എന്തിരൻ 2, സാഹോ എന്നിവ കഴിഞ്ഞാൽ ഏറ്റവും കൂടുതൽ കളക്ഷൻ നേടിയ സൗത്ത് ഇന്ത്യൻ ചിത്രവുമാണ് ഇപ്പോൾ ബിഗിൽ. ഏതായാലും ഇതോടെ വിജയ്‌യുടെ താരമൂല്യം മറ്റൊരു തലത്തിൽ എത്തിയിരിക്കുകയാണ്. ചിത്രത്തിന്റെ രചന നിർവഹിച്ചതും സംവിധായകൻ ആറ്റ്ലി തന്നെയാണ്. ലേഡി സൂപ്പർ സ്റ്റാർ നയൻതാര നായികാ വേഷത്തിൽ എത്തിയ ഈ ചിത്രത്തിൽ ബോളിവുഡ് താരം ജാക്കി ഷറോഫും അഭിനയിക്കുന്നുണ്ട്,

വനിതാ ഫുട്ബോൾ ടീം കോച്ച് ആയും ആ കഥാപാത്രത്തിന്റെ അച്ഛൻ ആയും ഇരട്ട വേഷത്തിൽ വിജയ് എത്തിയ ഈ ചിത്രത്തിൽ ഈ നടന്റെ പ്രകടനത്തിന് ഒപ്പം തന്നെ ശ്രദ്ധ നേടിയത് ഇതിലെ വനിതാ ഫുട്ബോൾ കളിക്കാർ ആയി അഭിനയിച്ച വനിതാ താരങ്ങൾ ആണ്. എ ആർ റഹ്മാൻ ഒരുക്കിയ സംഗീതവും ഈ ചിത്രത്തിന് വലിയ രീതിയിൽ മുതൽക്കൂട്ടായി. കലപതി എസ് അഘോരം, കലപതി എസ് ഗണേഷ്, കലപതി എസ് സുരേഷ് എന്നിവർ ചേർന്ന് എ ജി എസ് എന്റർടൈൻമെൻറ്സിന്റെ ബാനറിൽ നിർമ്മിച്ചിരിക്കുന്ന ഈ ചിത്രം ഓവർസീസ് മാർക്കറ്റിലും വമ്പൻ വിജയം ആണ് നേടിയത്.