ഇതൊരുഗ്രൻ ഐറ്റം ആയിരിയ്ക്കും കേട്ടോ; മാമാങ്കത്തെ കുറിച്ച് നീരജ് മാധവ്..!

മെഗാ സ്റ്റാർ മമ്മൂട്ടി നായകനായി എത്തുന്ന മാമാങ്കം എന്ന ബിഗ് ബജറ്റ് ചിത്രം കഴിഞ്ഞ ആഴ്ച മംഗലാപുരത്തു വെച്ച് ചിത്രീകരണം ആരംഭിച്ചു. നവാഗതനായ സജീവ് പിള്ള തിരക്കഥ രചിച്ചു സംവിധാനം ചെയ്യുന്ന ഈ ചിത്രം നിർമ്മിക്കുന്നത് ഏകദേശം അമ്പതു കോടി രൂപ മുതൽ മുടക്കി വേണു കുന്നപ്പിള്ളി ആണ്. മമ്മൂട്ടിയുടെ കരിയറിലെ തന്നെ ഏറ്റവും വലിയ ചിത്രമായി ഒരുങ്ങുന്ന മാമാങ്കം പതിനേഴാം നൂറ്റാണ്ടിലെ കഥയാണ് പറയുന്നത്. മമ്മൂട്ടിയോടൊപ്പം ഈ ചിത്രത്തിൽ യുവ താരം നീരജ് മാധവും ഒരു പ്രധാന വേഷം അവതരിപ്പിക്കുന്നുണ്ട്.

ഈ ചിത്രത്തിലെ തന്റെ ഭാഗം ചിത്രീകരിച്ചു കഴിഞ്ഞു എന്ന് നീരജ് മാധവ് തന്റെ ഫേസ്ബുക് പേജിലൂടെ അറിയിച്ചു. മമ്മൂട്ടി എന്ന ഇതിഹാസത്തിനൊപ്പം ജോലി ചെയ്യാൻ സാധിച്ചത് ഒരു ഭാഗ്യമായി കാണുന്നു എന്ന് പറഞ്ഞ നീരജ്, മാമാങ്കം ഒരുഗ്രൻ ഐറ്റം ആയി മാറുമെന്ന് പറയുന്നു.

സജീവ് പിള്ള എന്ന സംവിധായകന്റെ വിഷൻ പോലെ ഈ ചിത്രം പുറത്തു വന്നാൽ മാമാങ്കം ഒരു വലിയ സംഭവം തന്നെയായി മാറും എന്നാണ് നീരജ് മാധവ് പറയുന്നത്. വമ്പൻ മുതൽ മുടക്കിൽ ഒരുങ്ങുന്ന ഈ ചിത്രത്തിൽ അഞ്ചു നായികമാർ ഉണ്ടാകുമെന്നു റിപ്പോർട്ടുകൾ ഉണ്ട്. അതിൽ മൂന്നു പേര് മലയാളത്തിൽ നിന്നും ബാക്കി രണ്ടു പേര് ബോളിവുഡിൽ നിന്നുമാണ് എത്തുക.

തമിഴിൽ നിന്നു ഒരു യുവ താരം കൂടി ഈ ചിത്രത്തിന്റെ താര നിരയുടെ ഭാഗം ആകും. എം ജയചന്ദ്രൻ സംഗീതം ഒരുക്കുന്ന ഈ ചിത്രത്തിന് ദൃശ്യങ്ങൾ ഒരുക്കുന്നത് ജിം ഗണേഷും സംഘട്ടനം ഒരുക്കുന്നത് കെച്ചയുമാണ്. ആദ്യ ഷെഡ്യൂൾ ഈ മാസം മംഗലാപുരത്തു തീരുന്ന ഈ ചിത്രത്തിന്റെ അടുത്ത ഷെഡ്യൂൾ മെയ് മാസത്തിൽ കൊച്ചിയിലാണ് എന്നാണ് സൂചന. അടുത്ത വർഷം വിഷുവിനു ആയിരിക്കും മാമാങ്കം തീയേറ്ററുകളിൽ എത്തുക.