അത്തരമൊരു സിനിമയിൽ വേറെ ഒരു സൂപ്പർ താരവും ഭാഗമാവില്ല; മമ്മൂട്ടിക്ക് നന്ദി പറഞ്ഞ് നയൻതാര..!

മെഗാ സ്റ്റാർ മമ്മൂട്ടി, ലേഡി സൂപ്പർ സ്റ്റാർ നയൻതാര എന്നിവരെ കേന്ദ്ര കഥാപാത്രങ്ങളാക്കി നാലു വർഷം മുൻപ് പ്രശസ്ത സംവിധായകനും രചയിതാവുമായ എ കെ സാജൻ ഒരുക്കിയ ചിത്രമാണ് പുതിയ നിയമം. മമ്മൂട്ടിയും നയൻതാരയും ഭർത്താവും ഭാര്യയും ആയി അഭിനയിച്ച ഈ ത്രില്ലർ ചിത്രം നായികാ പ്രാധാന്യം ഉള്ള ഒരു ചിത്രം കൂടിയായിരുന്നു. നയൻതാര അവതരിപ്പിച്ച വാസുകി എന്നു പേരുള്ള കഥാപാത്രത്തിന് ചുറ്റുമാണ് ഈ ചിത്രത്തിന്റെ കഥ വികസിച്ചത്. ഇതിലെ ഗംഭീര പ്രകടനത്തിന് ഒട്ടേറെ അവാർഡുകളും നയൻതാരയെ ആ സമയത്തു തേടിയെത്തിയിരുന്നു. നയൻതാര അതിന് നന്ദി പറയുന്നത് തന്റെ കൂടെയഭിനയിച്ച മമ്മൂട്ടിയോട് കൂടിയാണ്.

മമ്മൂട്ടി ആ വേഷം ചെയ്തതിനു ഏറെ നന്ദിയുണ്ട് എന്നും സാധാരണ സൂപ്പർ താരങ്ങൾ അത്തരം ചിത്രങ്ങളിൽ അഭിനയിക്കാറില്ല എന്നും നയൻതാര പറയുന്നു. ഒരു സ്ത്രീ കേന്ദ്രീകൃത, നായികാ പ്രാധാന്യമുള്ള കമർഷ്യൽ ചിത്രത്തിലാണ് മമ്മൂട്ടി പരാതിയൊന്നും കൂടാതെ അഭിനയിച്ചത് എന്നും അത്കൊണ്ട് തനിക്കു ഈ അംഗീകാരം ലഭിച്ചതിൽ അദ്ദേഹത്തോടും നന്ദിയുണ്ട് എന്നുമാണ് നയൻതാര പറയുന്നത്. ഒരു അവാർഡ് ദാന ചടങ്ങിനിടെ വേദിയിൽ വെച്ചാണ് നയൻതാര ഇതു പറയുന്നത്. തന്റെ സൂപ്പർ താര പദവി നോക്കാതെ നല്ല സിനിമകൾ ചെയ്യാനാണ് മമ്മൂട്ടി ശ്രമിക്കുന്നതെന്നതിനു ഇത് ഒരുദാഹരണമാണെന്നാണ് മമ്മൂട്ടി ആരാധകർ നയൻതാരയുടെ വാക്കുകൾ പങ്കു വെച്ചു കൊണ്ട് പറയുന്നത്. അഡ്വക്കേറ്റ് ലൂയിസ് പോത്തൻ എന്ന കഥാപാത്രത്തെയാണ് പുതിയ നിയമം എന്ന ചിത്രത്തിൽ മമ്മൂട്ടിയവതരിപ്പിച്ചത്. രാപ്പകൽ, തസ്കര വീരൻ, ഭാസ്‌കർ ദി റാസ്‌കൽ തുടങ്ങിയ ചിത്രങ്ങളിലും മമ്മൂട്ടി നയൻതാരയോടൊപ്പം അഭിനയിച്ചിട്ടുണ്ട്.

ഫോട്ടോ കടപ്പാട്: ട്വിറ്റെർ