ബാഹുബലിയെ തകർക്കാൻ ബാലയ്യയുടെ അഖന്ധക്ക് കഴിയുമോ; കളക്ഷൻ റിപ്പോർട്ടുകൾ പറയുന്നത് ഇങ്ങനെ..!

തെലുങ്കിലെ സൂപ്പർ താരങ്ങളിൽ ഒരാളായ നന്ദമുറി ബാലകൃഷ്ണ എന്ന ബാലയ്യ നായകനായ പുതിയ ചിത്രമാണ് അഖണ്ഡ. സൂപ്പർ ഹിറ്റ് സംവിധായകനായ ബോയപ്പട്ടി ശ്രീനു ഒരുക്കിയ ഈ ചിത്രം, ദ്വാരക ക്രിയേഷൻസിന്റെ ബാനറിൽ മിര്യാല രവിന്ദർ റെഡ്ഢിയാണ് നിർമ്മിച്ചിരിക്കുന്നത്. ഈ കഴിഞ്ഞ ഡിസംബർ രണ്ടിന് റിലീസ് ചെയ്ത ചിത്രം മികച്ച പ്രേക്ഷക പ്രതികരണമാണ് നേടുന്നത്. ബോക്സ് ഓഫീസിലും മികച്ച കളക്ഷൻ ആണ് ഈ ചിത്രം നേടുന്നത്. തെലുങ്കിലെ ഏറ്റവും വലിയ വിജയമായ ബാഹുബലിയുടെ കളക്ഷൻ റെക്കോർഡ് അഖണ്ഡ തകർക്കുമോ എന്നാണ് ബാലയ്യ ആരാധകർക്ക് അറിയേണ്ടത്. ബാലയ്യയുടെ കരിയറിലെ ഏറ്റവും വലിയ വിജയത്തിലേക്ക് ആണ് അഖണ്ഡ കുതിക്കുന്നത്‌ എങ്കിലും, ബാഹുബലിയെ തകർക്കാൻ ഈ ചിത്രത്തിന് കഴിയില്ല എന്നാണ് റിപ്പോർട്ടുകൾ പറയുന്നത്.

ആദ്യ പതിമൂന്നു ദിവസം കൊണ്ട് ഈ ചിത്രം ആന്ധ്രപ്രദേശ്, തെലുങ്കാന സംസ്ഥാനങ്ങളിൽ നിന്നും നേടിയ ഗ്രോസ് 89 കോടിയോളമാണ്. ഏകദേശം അന്പത്തിയഞ്ചു കോടിയോളമാണ് ഈ ചിത്രം അവിടെ നിന്നും നേടിയ ഷെയർ. വേൾഡ് വൈഡ് ഗ്രോസ് ആയി നൂറു കോടിക്ക് മുകളിൽ നേടിയ ഈ ചിത്രം ബാലയ്യയുടെ ആദ്യത്തെ നൂറു കോടി ചിത്രവുമാണ്. പ്രഘ്യാ ജൈസ്വാൾ, ശ്രീകാന്ത് എന്നിവരും അഭിനയിച്ചിരിക്കുന്ന ഈ ചിത്രത്തിന് തമൻ എസ് ആണ് സംഗീത സംവിധാനം നിർവഹിച്ചിരിക്കുന്നത്. സിംഹ, ലെജൻഡ് എന്നീ ചിത്രങ്ങൾക്ക് ശേഷം ബാലയ്യ- ബോയപ്പട്ടി ശ്രീനു ടീംഒന്നിച്ച ഈ ചിത്രം അവരുടെ ഹാട്രിക്ക് സൂപ്പർ ഹിറ്റ് കൂടിയായി മാറിക്കഴിഞ്ഞു. ബാലയ്യയുടെ കിടിലൻ ആക്ഷൻ രംഗങ്ങൾ ആണ് ഈ ചിത്രത്തിന്റെ ഏറ്റവും വലിയ ഹൈലൈറ്റ് എന്നാണ് ആരാധകർ പറയുന്നത്.