കുടുംബം എന്താണെന്നും, ജീവിതം എന്താണെന്നും, പ്രാരാബ്ധം എന്താണെന്നും അറിയാവുന്നവന് ഈ സിനിമ ഇഷ്ടപ്പെടാതെ പോകില്ല; മേപ്പടിയാനെ പുകഴ്ത്തി നാദിർഷ..!

കഴിഞ്ഞ ദിവസമാണ് യുവ താരം ഉണ്ണി മുകുന്ദൻ നായകനായി എത്തിയ മേപ്പടിയാൻ എന്ന ചിത്രം റിലീസ് ചെയ്തത്. നവാഗത സംവിധായകന്‍ വിഷ്ണു മോഹന്‍ തിരക്കഥയെഴുതി സംവിധാനം ചെയ്ത ഈ ചിത്രം ഉണ്ണി മുകുന്ദന്റെ നിര്‍മ്മാണ സംരഭമായ യുഎംഎഫിന്റെ ആദ്യ ചിത്രമാണ്. ആദ്യ ഷോ മുതൽ തന്നെ മികച്ച പ്രേക്ഷക പ്രതികരണമാണ് ഈ ചിത്രം നേടുന്നത്. അതോടൊപ്പം നിരൂപകരും ചിത്രത്തിന് അഭിന്ദനം നൽകുന്നുണ്ട്. മലയാള സിനിമയിൽ നിന്നും പല പ്രശസ്ത വ്യക്തികളും ഈ ചിത്രം കണ്ടു മികച്ച അഭിപ്രായവുമായി മുന്നോട്ടു വരികയാണ്. അതിലൊരാൾ ആണ് പ്രശസ്ത സംവിധായകനും നടനുമായ നാദിർഷ. കഴിഞ്ഞ ദിവസം ഈ ചിത്രം കണ്ടതിനു ശേഷം നാദിർഷ കുറിച്ച വാക്കുകൾ ഏറെ ശ്രദ്ധ നേടുന്നുണ്ട്.

തന്റെ സോഷ്യൽ മീഡിയ പേജിൽ നാദിർഷ കുറിച്ചത് ഇങ്ങനെ, മേപ്പടിയാൻ കണ്ടു, കുടുംബം എന്താണെന്നും, ജീവിതം എന്താണെന്നും, പ്രാരാബ്ധം എന്താണെന്നും അറിയാവുന്നവന് ഈ സിനിമ ഇഷ്ടപ്പെടാതെ പോകില്ല. ജീവിതത്തിൽ ഇതൊന്നും ബാധിക്കാത്തവന്റെ അഭിപ്രായം എങ്ങനെയായിരിക്കും എന്നെനിക്കറിയില്ല. അഭിപ്രായ വ്യത്യാസമുള്ളവർ ക്ഷമിക്കണം. ജയകൃഷ്ണൻ എന്ന വർക്ക് ഷോപ് തൊഴിലാളിയായ ഒരു സാധാരണക്കാരന്റെ കഥയാണ് ഈ ചിത്രം പറയുന്നത്. ഉണ്ണി മുകുന്ദന്റെ കരിയറിലെ തന്നെ മികച്ച പ്രകടനങ്ങളിൽ ഒന്നാണ് ഈ ചിത്രത്തിൽ അദ്ദേഹം കാഴ്ച വെച്ചിരിക്കുന്നത്. അഞ്ജു കുര്യൻ നായികാ വേഷം ചെയ്ത ഈ ചിത്രത്തിൽ അജു വര്‍ഗീസ്, സൈജു കുറുപ്പ്, ഇന്ദ്രന്‍സ്,മേജര്‍ രവി, നിഷ സാരംഗ്, കലാഭവന്‍ ഷാജോണ്‍, ശ്രീജിത്ത് രവി, കുണ്ടറ ജോണി, ആര്യ, കൃഷ്ണപ്രസാദ്, പോളി വല്‍സന്‍, മനോഹരിയമ്മ എന്നിവരും അഭിനയിച്ചിട്ടുണ്ട്.